დისკუსია თემში მცხოვრებ ქალთა საჭიროებებზე

შეხვედრას ადგილობრივი არასამთავრობო და მედიაორგანიზაციების წევრები ესწრებოდნენ. დისკუსია გაიმართა პროექტის ”ქალები ქალებისათვის” ფარგლებში, რომელიც ხორციელდება ახალციხეში, ბორჯომში, ნინოწმინდასა და მარნეულში.

პროექტის მიზანი, თემში მცხოვრები ქალების საჭიროებების გამოკვეთა, მათი გააქტიურება და საარჩევნო პროცესებში ქალების ჩართულობაა.

ქალთა სამოქალაქო საბჭოს წევრებმა ახალციხეში ექვსი შეხვედრა გამართეს: ახალციხის საბარგო სადგურზე, დემოკრატიული ჩართულობის ცენტრში და სოფლებში – ბოგა, მუსხი, ურაველი და სხვილისი. როგორც ქალთა სამოქალაქო საბჭოს წევრი რუსუდან გვარამაძე ამბობს, შეხვედრებზე დასახელებულ საკითხებს, ახალციხის მერობის კანდიდატებს წარვუდგენენ და მათგან მოგვარების გზების შესახებ მოისმენენ: "2018 წლის ბიუჯეტის პროექტის დაგეგმვისას კი თვალს მივადევნებთ, მოხდა თუ არა ქალთა საჭიროებების ასახვა მთავარ ფინანსურ დოკუმენტში".

პროექტი ”ქალები ქალებისათვის” ხორციელდება ”სამცხე-ჯავახეთის მედიაცენტრის” მიერ, აღმოსავლეთ-დასავლეთის მართვის ინსტიტუტის (EWMI) ACCESS-ის პროექტის ფარგლებში, ამერიკის შეერთებული შტატების საერთაშორისო განვითარების სააგენტოს (USAID) ფინანსური მხარდაჭერით.

[sknews.ge]