შეხვედრა ახალციხის დემოკრატიული ჩართულობის ცენტრში გაიმართა.
„ჩვენი მთავარი ამოცანაა მოსახლეობას მივაწოდოთ ნეიტრალური პოზიციიდან ობიექტური ინფორმაცია, იმის შესახებ, რას ეფუძნება ჩვენი საგარეო პოლიტიკური პრიორიტეტები, რა გამოწვევების წინაშე ვდგავართ და რომელია ის გზა, რომელიც უნდა შევარჩიოთ იმისათვის, რომ ვიყოთ წარმატებული“, – ამბობს საქართველოს უსაფრთხოებისა და განვითარების ცენტრის (GCSD) დირექტორი ლევან დოლიძე.
მისი თქმით, ნატოსა და ევროკავშირის ინსტიტუტებთან დაკავშირებით საზოგადოების დიდ ნაწილს არასწორი წარმოდეგენები აქვს: „ქვეყანაში აქტიურად მოქმედებს პროპაგანდისტული მანქანა, რომელიც მიზნად ისახავს სკეპტიციზმისა და ნიჰილიზმის დამკვიდრებას ჩვენი ქვეყნის უსაფრთხოების მთავარ პრინციპებთან დაკავშირებით. არის მცდელობა საზოგადოების შეცდომაში შეყვანის. სხადასხვა მითების გავრცელების გზით იქმნება უარყოფითი სტერეოტიპები, რაც მიზნად ისახავს ჩვენი ქვეყნის საგარეო და უსაფრთხოების პოლიტიკის პრორიტეტების გადახედვას“.
„სამოქალაქო საზოგადოების ფორმირების ხელშემწყობი ცენტრის“ წარმომადგენელი ნინო რუხაძე ამბობს, რომ იმ მითების დასანგრევად, რაც საზოგადოებაში არსებობს, აუცილებელია სხვა ქვეყნების მაგალითებზე საუბარი: „მოსახლეობას არასწორი ინფორმაცია აქვს და დადებითი მაგალითების შესახებ უნდა ვისაუბროთ. სხვა ქვეყნის მაგალითებს ვგულისხმობ, რომლებსაც მიეცათ საშუალება ნატოში და ევროკავშირში გაწევრიანების შემდეგ განვითარების და ხელშეწყობის“.
შეხვედრის დამსწრე ჟურნალისტები ამბობენ, რომ მოქალაქეებს ხშირად აქვთ არასწორი მოლოდინები.
„ჩვენ ხშირად გვიწევს მოსახლეობის გამოკითხვა იმ საკითხებზე, როგორიცაა ნატო და ევროკავშირი. მათ ან არ აქვთ, ან აქვთ მცდარი ინფორმაცია და შესაბამისად, არასწორია მათი მოლოდინებიც. ამიტომ, მედიის როლი ძალიან მნიშვნელოვანია, ჩვენ უნდა ვიცოდეთ ძალიან კარგად ეს საკითხები, რომ სწორად მივაწოდოთ მოსახლეობას ინფორმაცია“, – ამბობს ტელეკომპანია „ბორჯომის“ ჟურნალისტი ეკა ნოზაძე.
დღესვე ამ საკითხებზე სასაუბროდ ლევან დოლიძე ახალციხის ახალგაზრდულ ცენტრში სკოლის მოსწავლეებს შეხვდა.
შეგახსენებთ, რომ გუშინ, 24 მარტს მედიისა და არასამთავრობო ორგანიზაციის წარმომადგენლებს, ევროკავშირის ისტორიაზე, მის ინსტიტუტებზე, აგრეთვე ევროკავშირისა და საქართველოს ურთიერთობებზე, ვიზა ლიბერალიზაციის პროცესსა და ევროკავშირის წევრი ქვეყნების მდგომარეობაზე საქართველოს რეფორმების ასოციაციის მკვლევარი
გიორგი გოგუაძე ესაუბრა. დღეს კი შეხვედრის თემა ნატო იყო.
ორდღიანი საინფრომაციო შეხვედრა საქართველოს უსაფრთხოებისა და განვითარების ცენტრის (GCSD) ორგანიზებით შედგა, პროექტის “VOTE SMART“ ფარგლებში. პროექტი ნიდერლანდების საგარეო საქმეთა სამინისტროს მიერ არის დაფინანსებული და 2016 წლის თებერვლიდან ხორციელდება. პროექტში ჩართულია თბილისის, ქუთაისის, ბათუმის, თელავის, მარნეულისა და ახალციხის მუნიციპალიტეტები. პროექტის ხანგრძლივობა 11 თვეა.
პროექტის მიზანია რეგიონებში მცხოვრები მოსახლეობის ინფორმირებულობის გაზრდა საგარეო პოლიტიკისა და ეროვნული უსაფრთხოების პრიორიტეტებზე.
[თინათინ ზაზაძე, ახალციხე]