ახალციხეში საქართველოს საგარეო პოლიტიკის შესახებ იმსჯელეს

შეხვედრა დემოკრატიული ჩართულობის ცენტრში შედგა. დისკუსიას სამცხე–ჯავახეთში მოქმედი არასამთავრობო ორგანიზაციებისა და მედიის წარმომადგენლები ესწრებოდნენ.

ევროკავშირის ისტორიაზე, მის ინსტიტუტებზე, აგრეთვე ევროკავშირისა და საქართველოს ურთიერთობებზე, ვიზა ლიბერალიზაციის პროცესსა და ევროკავშირის წევრი ქვეყნების მდგომარეობაზე დისკუსიის მონაწილეებს საქართველოს რეფორმების ასოციაციის მკვლევარი გიორგი გოგუაძე ესაუბრა.

მკვლევარი მონაწილეებს სხვადასხვა ქვეყნის მაგალითებზე დაყრდნობით უყვებოდა, რატომაა საქართველოსთვის მნიშვნელოვანი დასავლური კურსი.

შეხვედრა საქართველოს უსაფრთხოებისა და განვითარების ცენტრის (GCSD) ორგანიზებით შედგა, პროექტის “VOTE SMART“ ფარგლებში. პროექტი ნიდერლანდების საგარეო საქმეთა სამინისტროს მიერ არის დაფინანსებული და 2016 წლის თებერვლიდან ხორციელდება. პროექტში ჩართულია თბილისის, ქუთაისის, ბათუმის, თელავის, მარნეულისა და ახალციხის მუნიციპალიტეტები. პროექტის ხანგრძლივობა 11 თვეა.
პროექტის მიზანია რეგიონებში მცხოვრები მოსახლეობის ინფორმირებულობის გაზრდა საგარეო პოლიტიკისა და ეროვნული უსაფრთხოების პრიორიტეტებზე.

დღესვე ამავე თემაზე ლექცია ჩაუტარდათ სამცხე–ჯავახეთის სახელმწიფო უნივერსიტეტისა და პროფესიული კოლეჯის „ოპიზარის“ იმ სტუდენტებს, რომლებიც პირველად მონაწილეობენ არჩევნებში.

ამავე პროექტის ფარგლებში, შეხვედრა ხვალაც გაიმართება. ხვალ ლექციას საქართველოს უსაფრთხოებისა და განვითარების ცენტრის (GCSD) დირექტორი ლევან დოლიძე გაუძღვება. იგი საქართველო–ნატოს ურთერთობებზე, არსებულ მდგომარეობაზე და პერპექტივებზე ისაუბრებს.

[მარიამ ბარძიმაძე, ახალციხე]