ევროკავშირი და საქართველო – შეხვედრა ახალციხეში

ჟურნალისტებმა ეკა ფირცხალავამ და ირაკლი ტაბლიაშვილმა, ასევე ეკონომიკისა და მდგრადი განვითარების სამინისტროს წარმომადგენელმა გიორგი ჩიტაძემმ ევროკავშირი-საქართველოს ურთიერთობებსა და ბოლო ორ წელიწადში საქართველოს მიერ ევროკავშირისკენ გადადგმულ ნაბიჯებზე დეტალურად ისაუბრეს.

საუბარი შეეხო ვიზა ლიბერალიზაციასა და მასთან დაკავშირებულ პროცედურებს. ისაუბრეს რა დოკუმენტებია საჭირო უვიზოდ მგზავრობისათვის და რომელ ქვეყნებში, რა ვადით არის შესაძლებელი გადაადილება.

„ყველაზე მნიშვნელოვანი იქნება ის, რომ მალე გადაწყდება როგორც კონფლიქტის ზონაში მცხოვრები, ისე საქართველოს სხვა მოქალაქეებისათვის ევროპის ქვეყნებში უვიზოდ მიმოსვლის საკითხი. რეგიონის წარმომადგენლებს უნდა ჰქონდეთპროცედურებზე ინფორმაცია“, - განაცხადა ჟურნალისტმა ირაკლი ტაბლიაშვილმა, რომელიც ევროკავშირის საკითხებზე მუშაობს.

შეხვედრაზე ყველაზე მეტი დრო, ასოცირების ხელშეკრულების იმ ნაწილს დაეთმო, რომელიც ღრმა და ყოვლისმომცველი თავისუფალ სავაჭრო სივრცეს შესახებ შეთანხმებას ეხება. ეკონომიკის სამინისტროს წარმომადგენლის განმარტებით, საქართველომ ორ წელიწადში ევროპის ბაზარზე უკვე გაიტანა, როგორც სოფლის მეურნეობის (კივი, ლურჯი მოცვი და თხილი), ისე ხე-ტყის გადამუშავების შედეგად მიღებული პროდუქტები. ამასთან ერთად, ორ თვეში, ევროპის ბაზარზე ქართული თაფლიც გავა.

„2015 წლის განმავლობაში, თავისუფალი ვაჭრობის შედეგი გვაქვს ის, რომ ევროკავშირთან ბრუნვა გაიზარდა 6%-ით, გატანილი პროდუქტების რაოდენობა კი 4%-ით. რაც შეეხება 2016 წელს, ჯერ არ დაგვიჯამებია, ვფიქრობ, რომ ეს ციფრები კიდევ გაზრდილი იქნება“, - ამბობს ეკონომიკის სამინისტროს წარმომადგენელი გიორგი ჩიტაძე.

მისივე თქმით, თავისუფალი ვაჭრობის შესახებ ხელშეკრულება, უკვე გაფორმებულია ლიხტენშტეინთან, შვეიცარიასთან, ისლანდიასთან და ნორვეგიასთან. მოლაპარაკებები კი ჩინეთთან მიმდინარეობს.

ახალციხეში დისკუსია ლევან მიქელაძის სახელობის ფონდის ორგანიზებით, პროექტის, „სამოქალაქო საზოგადოების შესაძლებლობების განვითრება ეთნიკური უმცირესობებით დასახლებულ რეგიონებში“ ფარგლებში მოეწყო. პროექტის ფარგლებში, გუშინ, მედიის წარმომადგენლებისთვის ტრენინგიც ჩატარდა.

პროექტი სამცხე-ჯავახეთსა და ქვემო ქართლში ხორციელდება.

„ჩვენი მიზანი, რეგიონებში საზოგადოებრივი ცნობიერების ამაღლებაა, იმისათვის რომ ევროკავშირი - საქართველოს ურთიერთობების შესახებ ყველა ინფორმაცია მიიღონ“,-აღნიშნალევან მიქელაძის სახელობის ფონდის განვითარების პროგრამის დირექტორმა ეკა ბარამიძემ.

მისივე თქმით, ორგანიზაციამ "ევროპის ფონდი" კვლევა ჩაატარა, რომლის მიხედვითაც აღმოჩნდა, რომ ეს ორი რეგიონი ყველაზე ნაკლებად იყო ინფორმირებული საქართველო-ევროკავშირის ურთიერთობების შესახებ.

[ლუბა გიორგაძე, ახალციხე]