ახალციხეში ავარიის შედეგად ქალი გარდაიცვალა

ავტოსაგზაო შემთხვევა ახალციხის შემოსასვლელში, საბარგო სადგურზე მოხდა. როგორც საბარგო სადგურზე მცხოვრებლები ამბობენ, „სუბარუს“ მარკის ავტომობილი „ოპელსა“ და ტრაილერს დაეჯახა. მომხდარის შედეგად ერთ–ერთი ავტომანქანის, 'ოპელის' მძღოლი ქალი ადგილზე გარდაიცვალა.

შემთხვევის შედეგად სამი ადამიანი დაშავდა, – ორი მათგანი ახალციხის რეფერალურ ჰოსპიტალში მიიყვანეს, ერთი კი კლინიკა "იმედში".

სამივე მათგანი ამ დრომდე სამედიცინო დაწესებულებებში რჩება. ახალციხის რეფერალურ ჰოსპიტალში 'სამხრეთის კარიბჭეს' განუცხადეს, რომ ამ დროისათვის დაშავებულების დიაგნოსტირება მიმდინარეობს. ორივე დაშავებულის მდგომარეობა სტაბილურია. სტაბილური მდგომარეობა აქვს კლინიკა "იმედში" მიყვანილ დაშავებულსაც. კლინიკაში აცხადებენ, რომ პაციენტს მრავლობითი დაჟეჟილობები აქვს და მკურნალობის კურსს გადის.

როგორც შინაგან საქმეთა სამინისტროში აცხადებენ, მომხდარზე ძიება სისხლის სამართლის კოდექსის 276–ე მუხლის მეხუთე ნაწილით დაიწყო, რაც მოძრაობის უსაფრთხოების წესების დარღვევას გულისხმობს, რამაც ერთი ადამიანის სიცოცხლის მოსპობა გამოიწვია.

[sknews.ge]