ავტოსაგზაო შემთხვევა ბორჯომში – გარდაცვლილია 45 წლამდე ასაკის მამაკაცი

თვითმხილველების ინფორმაციით, "დაფის" მარკის სატვირთო ავტომობილი თბილისიდან ბორჯომის მიმართულებით მოძრაობდა. სოფელ რველთან მოძრაობის საპირისპირო მხარეს გადავიდა და ამოტრიალდა. მომხდარის გამო დაზიანდა ბორჯომიდან თბილისის მიმართულებით მოძრავი ჯიპიც. ჯიპის მძღოლს, რომელიც ბორჯომის მუნიციპალიტეტის სოფელ ყვიბისის მაცხოვრებელია, დაზიანება არ მიუღია.

როგორც თვითმხილველები ამბობენ, სატვირთო ავტომობილის მძღოლი დაახლოებით 45 წლამდე ასაკის მამაკაცი იყო, რომელიც ადგილზევე გარდაიცვალა. მას ქალა ტვინის ძლიერი ტრამვა ჰქონდა მიღებული. შემთხვევის შედეგად სხვა დაშავებულები არ არიან.

ავტოსაგზაო შემთხვევის გამო დროებით შეფერხდა მოძრაობა სოფელ რველთან. ადგილზე მობილიზებულია საპატრულო პოლიცია, ასევე სასწრაფო დახმარებისა და სამაშველო სამსახურის ბრიგადები.

საქართველოს შინაგან საქმეთა სამინისტროს ინფორმაციით, აღნიშნულ ფაქტთან დაკავშირებით გამოძიება მიმდინარეობს საქართველოს სსკ-ის 276-ე მუხლის, მეხუთე ნაწილით, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს, რამაც გამოიწვია ადამიანის სიცოცხლის მოსპობა.



[თამარ თოთაძე, ბორჯომი]