ვააგნ ჩახალიანი პოლიტიკური პატიმრების სიიდან ამოიღეს

14 ხმა 77-ის წინააღმდეგ - ამ შედეგით დამტკიცდა პოლიტპატიმართა 190-კაციანი და პოლიტიკურ დევნილთა 25-კაციანი სია 5 დეკემბერს. ამ სიაში მოხვედრილი პირები გათავისუფლდებიან სასჯელაღსრულების დაწესებულებებიდან ან შეჩერდება მათი სისხლის სამართლის დევნა.

პოლიტპატიმრებად და პოლიტიკურ დევნილებად აღიარეს პირები, რომლებიც ციხეში წინა მთავრობის დროს მოხვდნენ ან იძულებულნი გახდნენ, საქართველო დაეტოვებინათ. 25 პოლიტიკურ დევნილს შორის არის პარლამენტის ყოფილი დეპუტატი, ახლახანს სისხლის სამართლის დევნის გამო საქართველოდან წასული მელიქ რაისიანი.

ვააგნ ჩახალიანის სახელი პოლიტიკური პატიმრების სიიდან ამოიღეს და მისი საქმე ადამიანის უფლებათა კომიტეტში უფრო დაწვრილებითი განხილვისთვის დააბრუნეს. ვააგნ ჩახალიანის ადვოკატის ნინო ანდრიაშვილის თქმით, ჩახალიანი სიიდან „ნაციონალური მოძრაობის“ დეპუტატების გამოსვლის გამო ამოიღეს.

„გამოვიდნენ ბაქრაძე, ხაჩიძე, გაბაშვილი. ბაქრაძემ თქვა, რომ ჩახალიანი ახალქალაქში მონაზვნის ცემაში მონაწილეობდა, არაფერი მსგავსი არ მომხდარა. ამ მიზეზით მე მთავარ პროკურატურაში ცილისწამებაზე საჩივარი შევიტანე“, - ამბობს ანდრიაშვილი.

მისი თქმით, საქმის დაწვრილებითი განხილვისთვის კიდევ ერთი თვეა და სავარაუდოდ, ვააგნ ჩახალიანის სახელი პოლიტპატიმართა სხვა სიაში შევა, რომელიც პარლამენტს ცოტა მოგვიანებით წარედგინება.

შეგახსენებთ, რომ ვააგნ ჩახალიანი 2009 წლის 7 აპრილს ახალციხის სასამართლომ საქართველოს სისხლის სამართლის კოდექსის 3 მუხლით გაასამართლა. მას თავისუფლების 10 წლით აღკვეთა აქვს მისჯილი და უკვე 4 წელია ციხეში იმყოფება.

[ქრისტინა მარაბიანი, ახალქალაქი]