ჩახალიანის ოჯახმა არმენ ჩახალიანის დაკავება გაასაჩივრა

არმენ ჩახალიანს ბრალი საქართველოს სისხლის სამართლის კოდექსის 239-ე მუხლის (ხულიგნობა) მე-2 (პოლიციის მიმართ დაუმორჩილებლობა) და მე-3 პუნქტებით (ცივი იარაღის გამოყენება) აქვს წაყენებული.

ვაჰაგან ჩახალიანის თქმით, მისი ძმის ადვოკატი სასამართლოს დაკავებულის გირაოთი გათავისუფლებას სთხოვდა, თუმცა მოსამართლემ მას ორ თვიანი წინასწარი პატიმრობა შეუფარდა.

"სასამართლო ითხოვდა, რომ ჩემს ძმას დანაშაულის საკუთარ თავზე აეღო, როგორ შეიძლება დაიბრალო დანაშაული, რომელიც არ ჩაგიდენია. საქმეზე 50 მდე ადამიანი იყო ეჭვმიტანილი, თუმცა პატიმრობა მხოლოდ ჩემს ძმას შეეფარდა, ვფიქრობ რომ ამას პოლიტიკური ქვეტექსტი გაყვება", - აცხადებს ვაჰაგნ ჩახალიანი.

შეგახსენებთ, რომ 28 ივნისს გვიან საღამოს, ნინოწმინდის მუნიციპალიტეტის სოფელ გონდურაში ახალგაზრდებს შორის ყოფით ნიადაგზე ჩხუბი მოხდა. შედეგად, არმენ ჩახალიანი და კიდევ 30 ახალგაზრდა დააპატიმრეს. დაკავებული 30 ადამიანიდან, 26 პიროვნება იმავე დღეს გაათავისუფლეს. არმენ ჩახალიანი და კიდევ 3 ახალგაზრდა დაკითხვაზე ახალციხეში გადაიყვანეს. 30 ივნისის საღამოს პატიმრობიდან გაათავისუფლეს კიდევ ერთი დაკავებული, 1 ივლისის შუადღეს კი დარჩენილი ორი მათგანიც. პატიმრობაში მხოლოდ არმენ ჩახალიანი რჩება 2 თვიანი განაჩენით.

საზოგადოება „ერთიანი ჯავახეთის“ ხელმძღვანელი ვაჰაგნ ჩახალიანი, ამბობს, რომ მისი ძმა პოლიტიკური მოტივითაა დაკავებული. 30 ივნისს, მან განცხადებაც გაავრცელა, რომელშიც ამბობს, რომ მისი ძმის დაკავება პროვოკატორული მოქმედებაა და ამის ავტორები სააკაშვილისა და მერაბიშვილის ნების ყოფილი შემსრულებლები არიან.

შეგახსენებთ, რომ ვაჰაგნ ჩახალიანი, მამასთან და ძმასთან ერთად, 2008 წელს დააკავეს. მათ ჯგუფურ ხულიგნობაში მონაწილეობა და ცეცხლსასროლი იარაღის, საბრძოლო მასალის და ფეთქებადი ნივთიერების შეძენა-შენახვა ედებოდათ ბრალად. ვაჰაგნ ჩხალიანის მამა და ძმა მაშინ სასამართლომ გირაოს სანაცვლოდ გაათავისუფლა. ვაჰაგნ ჩახალიანი კი დამნაშავედ სცნო. იგი პატიმრობიდან მიმდინარე წლის 24 იანვარს, ამნისტიის შედეგად გათავისუფლდა.

[sknews.ge]