არმენ ჩახალიანის საქმეზე წინასწარი მოსმენა 9 აგვისტოს გაიმართება

შეგახსენებთ, რომ არმენ ჩახალიანს, რომელიც 28 ივნისს, ნინოწმინდის მუნიციპალიტეტის სოფელ გონდურაში მომხდარი ჩხუბისას დააკავეს, 1 ივლისს 2-თვიანი წინასწარი პატიმრობა შეუფარდეს. ამ საქმესთან დაკავშირებით პირველი სასამართლო პროცესი ნინოწმინდის სასამართლოში გაიმართა. მოსამართლე იური უნანიანმა საქართველოს სისხლის სამართლის კოდექსის 198–ე მუხლის 1-ელ პუნქტზე დაყრდნობით, უმცროსი ჩახალიანის წინასწარ პატიმრობაში დატოვების გადაწყვეტილება მიიღო.

აქვე შეგახსენებთ, რომ 28 ივნისს სოფელ გონდურაში ყოფით ნიადაგზე მომხდარი ჩხუბის შედეგად დაპატიმრებული 30 ახალგაზრდიდან, 26 მათგანი იმავე დღეს გაათავისუფლეს. ოთხი მონაწილე კი, მათ შორის ვაჰაგნ ჩახალიანის ძმა, ახალციხეში გადაიყვანეს დასაკითხად. ერთ–ერთი მათგანი მტკიცებულებათა არქონის გამო მეორე დღესვე გაათავისუფლეს, ორმა პირველ ივლისს, 4000-ლარიანი გირაოს სანაცვლოდ დატოვა საკანი. მათი სასამართლო 11 ივლისს გაიმართება.

პატიმრობაში მხოლოდ ვაჰაგნ ჩახალიანის ძმა არმენ ჩახალიანი რჩება, რომელსაც 2013 წლის 30 ივნისს საქართველოს სისხლის სამართლის კოდექსის 239–ე მუხლის (ხულიგნობა) მიხედვით წარუდგინეს ბრალი, ასევე იმავე კანონის მე–2 და მე–3 მუხლებით, რაც კანონის წარმომადგენლებისთვის წინააღმდეგობის გაწევასა და ცივი იარაღის გამოყენებას გულისხმობს.

არმენ ჩახალიანის ოჯახმა ნინოწმინდის მაგისტრატი სასამართლოს გადაწყვეტილება 3 ივლისს ახალქალაქის რაიონულ სასამართლოში გაასაჩივრა. თუმცა, სასამართლოდან პასუხი ჯერ არ მიუღიათ.

ჩახალიანის ადვოკატის ნინო ანდრიაშვილის განმარტებით, მისი კლიენტის წინასწარ პატიმრობაში დატოვების შესახებ სასამართლოს გადაწყვეტილება უკანონოა.

„ბრალდებულის მიმართ წინასწარი დაკავების ზომა გამოყენებულ იქნა ბრალის არაღიარების გამო“, - წერია არმენ ჩახალიანის საქმეში.

არმენ ჩახალიანის საქმეზე წინასწარი სასამართლო განხილვა 2013 წლის 9 აგვისტოს დღის 13:00 საათზეა დანიშნული. 1 ივლისის შემდეგ არმენ ჩახალიანი თბილისში, გლდანის ციხეში გადაიყვანეს.

საზოგადოება „ერთიანი ჯავახეთის“ ხელმძღვანელი ვაჰაგნ ჩახალიანი, ამბობს, რომ მისი ძმა პოლიტიკური მოტივითაა დაკავებული. 30 ივნისს, მან განცხადებაც გაავრცელა, რომელშიც ამბობს, რომ მისი ძმის დაკავება პროვოკატორული მოქმედებაა და ამის ავტორები სააკაშვილისა და მერაბიშვილის ნების ყოფილი შემსრულებლები არიან.

შეგახსენებთ, რომ ვაჰაგნ ჩახალიანი, მამასთან და ძმასთან ერთად, 2008 წელს დააკავეს. მათ ჯგუფურ ხულიგნობაში მონაწილეობა და ცეცხლსასროლი იარაღის, საბრძოლო მასალის და ფეთქებადი ნივთიერების შეძენა-შენახვა ედებოდათ ბრალად. ვაჰაგნ ჩხალიანის მამა და ძმა მაშინ სასამართლომ გირაოს სანაცვლოდ გაათავისუფლა. ვაჰაგნ ჩახალიანი კი დამნაშავედ სცნო. იგი პატიმრობიდან მიმდინარე წლის 24 იანვარს, ამნისტიის შედეგად გათავისუფლდა.

[sknews.ge]