ვაჰაგნ ჩახალიანის ძმა პატიმრობაში რჩება

დაკავებული ოთხი მოქალაქიდან, ერთი გუშინ, 30 ივნისს, საღამოს გაათავისუფლეს. ორი კი დღეს, 1 ივლისს, შუადღეს. ვაჰაგნ ჩახალიანის ძმა, არმენ ჩახალიანი კიდევ დაკავებულია. მას საქართველოს სისხლის სამართლის კოდექსის 239-ე მუხლის, მე-2 და მე-3 ნაწილის მიხედვით აქვს ბრალი წაყენებული.

შეგახსენებთ, რომ ოთხი მოქალაქე, 28 ივნისის, გვიან საღამოს, ნინოწმინდის მუნიციპალიტეტის სოფელ გონდურაში ახალგაზრდებს შორის ყოფით ნიადაგზე მომხდარი დაპირისპირების დროს დააკავეს.

საზოგადოება „ერთიანი ჯავახეთის“ ხელმძღვანელი ვაჰაგნ ჩახალიანი, ამბობს, რომ მისი ძმა პოლიტიკური მოტივითაა დაკავებული. 30 ივნისს, მან განცხადებაც გაავრცელა, რომელშიც ამბობს, რომ მისი ძმის დაკავება პროვოკატორული მოქმედებაა და ამის ავტორები სააკაშვილისა და მერაბიშვილის ნების ყოფილი შემსრულებლები არიან.

შეგახსენებთ, რომ ვაჰაგნ ჩახალიანი, მამასთან და ძმასთან ერთად, 2008 წელს დააკავეს. მათ ჯგუფურ ხულიგნობაში მონაწილეობა და ცეცხლსასროლი იარაღის, საბრძოლო მასალის და ფეთქებადი ნივთიერების შეძენა-შენახვა ედებოდათ ბრალად. ვაჰაგნ ჩხალიანის მამა და ძმა მაშინ სასამართლომ გირაოს სანაცვლოდ გაათავისუფლა. ვაჰაგნ ჩახალიანი კი დამნაშავედ სცნო. იგი პატიმრობიდან მიმდინარე წლის 24 იანვარს, ამნისტიის შედეგად გათავისუფლდა.

[აღუნიკ აივაზიანი, ახალქალაქი]