ვაჟა ჩიტაშვილი: ”ჩახალიანი სამართლებრივად სწორად იქნა გათავისუფლებული”

ახალციხის მაჟორიტარი დეპუტატი ვაჟა ჩიტაშვილი, რომელსაც მანამდე სამცხე-ჯავახეთის ოლქის პროკურორის თანამდებობა ეკავა და რომელიც ჩახალიანის პოლიტმატიამრთა სიიდან ამოღების ერთ-ერთი ინიციატორი იყო, აცხადებს რომ ჩაახალიანი პატიმრობიდან სამართლებრივად სწორად იქნა გათავისუფლებული.

”მას შეეხო ჩვეულებრივ მუხლობრივი ამნისტია, ეს იყო ხულიგნობის მუხლი, ასევე ჯგუფური მოქმედების ორგანიზება 226-ე მუხლი. მის მიერ ჩადენილი დანაშაულებები სწორედ ამ მუხლებს ეხებოდა და ამიტომ გათავისუფლდა ის ისე, როგორც სხვა პატიმრები”, - გვიხსნის ჩიტაშვილი.

მისი თქმით, ის რომ აქამდე პოლიტმატიმართა სიაში შეყვანილი ჩახალიანი ხელისუფლებამ აღნიშნული სიიდან ამოიღო, დადებითი ნაბიჯია, რადგან ასე რომ არ ყოფილიყო ეს იქნებოდა ”ლომის გალიიდან გამოშვება” და მისი ერთგვარი წახალისება: ”გამოვიდოდა, რომ ის იყო დაკავებული არა იმიტომ, რომ დანაშაულები ჩაიდინა, არამედ იმიტომ, რომ მის მიმართ პოლიტიკურ დევნას ახორცილებდა ხელისუფლება. როგორც პოლიტპატიმარი ისე რომ გამოეშვათ, მეტი შანსი იყო, რომ სეპარატისტული აზრები ადუღებოდა თავში”.

მიუხედავად იმისა, რომ ჩახალიანი როგორც პოლიტპატიმარი ისე არ იყო გათავისუფლებული, ჩიტაშვილს მაინც ჰგონია, რომ ”ეს ადამიანი იქაური პოლიტიკიდან არ წავა, არ დაანებებს თავას იმას, სადაც იყო და რასაც აკეთებდა”.

ჩახალიანი ციხეში მეხუთე წელია რაც იჯდა და მას პატიმრობა 10 წელი ჰქონდა მისჯილი.

ჩიტაშვილის განმარტებით, მას ბრალი არაერთი ჯგუფური მოქმედების ორგანიზებისათვის ედებოდა. როგორც ყოფილი პროკურორი ”სამხრეთის კარიბჭესთან” იხსენებს, ჩახალიანმა შეკრიბა 500-მდე კაცი და საქართველოს სახელმწიფოს წინააღმდეგ შეძახილებით დაბლოკა ახალქალაქის გამგეობის შენობა, შეიჭრა ახალქალაქისა და კუმურდოს ეპარქიაში, სადაც შეურაცხყოფა მიაყენა მონაზვნებს, ასევე შეიჭრა ახალქალაქის უნივერსიტეტსა და საგადასახადო სამსახურში: ”მას ჯავახეთის ავტონომია სურდა”.

ჩახალიანის ადვოკატის ნინო ანდრიაშილის თქმით, მის დაცვის ქვეშ მყოფს ბრალს დანაშაულის ორგანიზებისთვის უყენებდნენ. სასამართლომ ეს ბრალი მოუხსნა და პატიმრობა მხოლოდ მონაწილეობისთვის მიუსაჯა. თუმცა, ადვოკატი, არც ამას ეთნხმება და აცხადებს, რომ 10 წელი ჩახალიანს შეთითხნილი ბრალდებებით ჰქონდა მისჯილი. ამიტომ მისი საქმე გაგზავნილია ევროსასამართლოში და როგორც კი შეიქმნება კომისია, რომელსაც უკანონო განაჩენები დაექვემდებარება, საქმესაც შეიტანენ ხელახლა გამოსაძიებლად.

”მას შემდეგ, რაც ამოიღეს პოლიტმატიმართა სიიდან, კვლავ მივმართეთ პარლამენტს და ველოდებით გადაწყვეტილებას. რადგან ამნისტიით გაათავისუფლეს, ვფიქრობთ პასუხი უარყოფითი მოგვივა”, - განუცხადა ”სამხრეთის კარიბჭეს” ანდრიაშვილმა სატელეფონო საუბრისას.

[თამუნა უჩიძე, ახალციხე]