ვაჰაგნ ჩახალიანს ორ თვეში გაათავისუფლებენ

სომხურ მედიაში გათავისუფლებულ 190 პოლიტპატიმარს შორის ახალქალაქელ საზოგადოებრივ-პოლიტიკურ მოღვაწეს ვაჰაგნ ჩახალიანსაც ასახელებდნენ, თუმცა, 5 იანვარს საქართველოს პარლამენტის სხდომაზე ჩახალიანის სახელი პოლიტპატიმართა სიიდან ამოიღეს. ამის მიზეზი გახდა „ნაციონალური მოძრაობის“ დეპუტატების გამოსვლა, რომელთაც ჩახალიანი სასულიერო პირზე თავდასხმაში დაადანაშაულეს.

გათავისუფლების პირველი ეტაპი ვაჰაგნს არ შეეხო, თუმცა, როგორც ჩახალიანის ადვოკატმა ნინო ანდრიაშვილმა გვაცნობა, ყველა სტატია, რომლის მიხედვითაც ვაჰაგნ ჩახალიანს 10 წლით პატიმრობა ქონდა მისჯილი, ამნისტიის კანონის ფარგლებში ხვდება. ვაჰაგნ ჩახალიანის საქმე უკვე სასამართლოშია გადაცემული და როგორც ადვოკატი ამტკიცებს, ჩახალიანი მომდევნო ორი თვის განმავლობაში აუცილებლად გამოვა ციხიდან.

„ახლა ამნისტიის შესახებ კანონის თანახმად სასამართლოს ბევრი მიმართავს. ჩვენც მივმართეთ, თუმცა, ჩვენ აუცილებლად მივაღწევთ იმასაც, რომ ვაჰაგნ ჩახალიანი პოლიტიკურ პატიმრად აღიარონ“, - ამბობს ნინო ანდრიაშვილი.

შეგახსენებთ, რომ არასამთავრობო ორგანიზაცია „ჯავახეთის ახალგაზრდული სპორტულ-კულტურული კავშირის“ დამაარსებელი და ხელმძღვანელი და პოლიტიკური ორგანიზაცია „ერთიანი ჯავახეთის“ ერთ-ერთი დამაარსებელი ვაჰაგნ ჩახალიანი უკვე ხუთი წელია პატიმრობაში იმყოფება. 2008 წლის 21 ივლისს ვაჰაგნ ჩახალიანი დააპატიმრეს, ხოლოდ 2009 წლის აპრილში თავისუფლების 10 წლით აღკვეთა მიუსაჯეს „იარაღის შენახვისა“ და „საზოგადოებრივი წესრიგის დამრღვევი მასობრივი ღონისძიებების მოწყობის“ ბრალდებით.

13 იანვარს 190 გათავისუფლებულ პოლიტპატიმარს შორის ასევე იყვნენ წარმოშობით სომხები, აჭარის სომხური თემის წარმომადგენლები არმენ გევორქიანი და რუბენ შექოიანი, რომლებსაც თავისუფლების 11 წლით აღკვეთა ქონდათ მისჯილი.

[ქრისტინა მარაბიანი, ახალქალაქი]