ვაჰაგნ ჩახალიანი - ჩემი ძმა მახეში გაება

28 ივნისს, საღამოს, ნინოწმინდის მუნიციპალიტეტის სოფელ გონდურაში მომხდარი შელაპარაკების გამო, სამართალდამცველებმა ოთხი ახალგაზრდა დააკავეს. მათ შორის, ვაჰაგნ ჩახალიანის ძმა, არმენ ჩახალიანი. ამ დროისთვის ოთხივე პიროვნება პატიმრობაში რჩება.

საზოგადოება „ერთიანი ჯავახეთის“ ხელმძღვანელი ვაჰაგნ ჩახალიანი, რომელიც ამნისტიით, მიმდინარე წლის, 24 იანვარს გათავისუფლდა, ამბობს, რომ მისი ძმა შელაპარაკებაში შეგნებულად გარიეს.

„კამათი ყოფით დონეზე მოხდა. ეს იყო ჩვეულებრივი ჩხუბი, რომელშიც ჩემი ძმა თავიდან არც იყო ჩარეული. დაბადების დღეზე იყო, როცა დაურეკეს და დაუძახეს. ჩემთვის სრულიად ნათელია, როგორ ჩარიეს ჩემი ძმა ამ ყველაფერში“, - ამბობს იგი.

ვაჰაგნ ჩახალიანის თქმით, მისი ძმა შეცდომაში შეიყვანეს: „უთხრეს, რომ ახალგაზრდებმა ძალიან მაგრად იჩხუბეს. ადგილზე მისული ცდილობდა ისინი დაეწყნარებინა, ეუბნებოდა არ ეჩხუბათ. არმენი შუა დაბადების დღიდან წავიდა, რათა შემთხვევით სისხლი არ დაღვრილიყო“.
ჩახალიანის თქმით, მისი დაპატიმრებული ძმა მხოლოდ იმაშია დამნაშავე, რომ ჩხუბის შესაჩერებლად წავიდა. დაკავება კი შემთხვევით არ მომხდარა.

„მივიდნენ და 100–200 ადამიანში ზუსტად ჩემი ძმა დააპატიმრეს. ერთ–ერთმა მოწმემ თქვა, რომ როდესაც პოლიცია მივიდა, არმენმა უთხრა მათ, რომ არმენ ჩახალიანი იყო. ინფორმაცია, თითქოს სამართალდამცველებმა ჩემი ძმა სცემეს, სიცრუეა. ესაა პროვოკაცია, რომელიც რაიონში ჯერ კიდევ დარჩენილმა სააკაშვილის და მერაბიშვილის ხალხმა მოაწყო. გუშინ განცხადებებს მთელი დღე არ ვაკეთებდი, რადგან ყველაფერი გარკვეული არ იყო. თუმცა საკუთარი გამოძიების შედეგად ნათელი გახდა, რომ არმენი მახეში გაება. შემთხვევა მოხდა ნინოწმინდაში, მაქვს კითხვა, რატომ წაიყვანეს იგი ახალციხეში?! არმენის დანაშაული მხოლოდ ისაა, რომ ჩემი ძმაა. იმედი მინდა მქონდეს, რომ ცენტრალურმა ხელისუფლებამ არ იცის, რა ხდება ახალქალაქში“, – განუცხადა ვაჰაგნ ჩახალიანმა „სამხრეთის კარიბჭეს“.

შეგახსენებთ, რომ შსს-ს ინფორმაციით, ვაჰაგნ ჩახალიანის ძმა არმენ ჩახალიანი, 3 მეგობართან ერთად, ჯგუფური ხულიგნობის მუხლითაა დაკავებული

30 ივნისს, ვაჰაგნ ჩახალიანმა განცხადება გაავრცელა, რომელშიც ამბობს, რომ მისი ძმის დაკავება პროვოკატორული მოქმედებაა და ამის ავტორები სააკაშვილისა და მერაბიშვილის ნების ყოფილი შემსრულებლები არიან.

[აღუნიკ აივაზიანი, ახალქალაქი]