რეგიონებში განსახორციელებელი პროექტების ფონდიდან სამცხე-ჯავახეთში 38 პროექტი განხორციელდება

მუნიციპალიტეტების ხელმძღვანელმა პირებმა 2016 წლისათვის, რეგიონში დაგეგმილი ინფრასტრუქტურული პროექტების, მათი სატენდერო პირობების, სამშენებლო სამუშაოების დაწყებისა და დასრულების ვადების შესახებ იმსჯელეს.

2016 წელს, რეგიონებში განსახორციელებელი პროექტების ფონდიდან სამცხე-ჯავახეთში 15 600 631 ლარის ღირებულების 38 პროექტი განხორციელდება.

განსაზღვრულია პრიორიტეტები:

გზების რეაბილიტაცია - 30 პროექტი. მის ფარგლებში დაიგება 42 კილომეტრამდე გზა;

სასმელი წყლის სისტემების რეაბილიტაცია - 3 ობიექტი. მისი საერთო სიგრძე 20,2 კილომეტრს შეადგენს;
ბაკურიანში საკანალიზაციო სისტემის რეაბილიტაციის პროექტი- 2,9 კილომეტრი.

გარდა ამისა, მიმდინარე წელს მხარის მუნიციპალიტეტებში დაგეგმილია მრავალბინიანი საცხოვრებელი კორპუსების ეზოების, ტროტუარების, სკვერისა და სტადიონის რეაბილიტაციის პროექტების განხორციელება.

სამხარეო საკონსულტაციო საბჭოს სხდომას ესწრებოდნენ სამცხე-ჯავახეთის გუბერნატორი აკაკი მაჭუტაძე, ახალციხის მერი, მხარის მუნიციპალიტეტების გამგებლები, საკრებულოს თავმჯდომარეები და მათი მოადგილეები.

აღნიშნული საბჭო გუბერნატორთან არსებული საკონსულტაციო ორგანოა, რომელიც საქმიანობს საქართველოს ორგანული კანონის „ადგილობრივი თვითმმართველობის კოდექსით“ დადგენილი წესით. დებულების თანახმად საბჭო მინიმუმ სამ თვეში ერთხელ იკრიბება, წინა სხდომა გასული წლის 17 დეკემბერს გაიმართა.

[თაკო ფეიქრიშვილი, ნინოწმინდა]