2018 წელს სამცხე–ჯავახეთში, რეგიონული ფონდიდან 19 მლნ ლარის პროექტები განხორციელდება

სამცხე-ჯავახეთის სამხარეო საკონსულტაციო საბჭომ ნინოწმინდაში მორიგი სხდომა გაიმართა. საბჭოს წევრებმა დღის წესრიგით გათვალისწინებული სხვადასხვა საკითხები განიხილეს. მათ შორის, სამცხე-ჯავახეთის სტრატეგიული განვითარების 2018-2021 წლების სამოქმედო გეგმა.

2018-2021 წლებში ჯამში, მხარის მასშტაბით, რეგიონებში განსახორციელებელი პროექტების ფონდის, მთის ფონდის, მუნიციპალური განვითარების ფონდისა და ადგილობრივი ბიუჯეტების დაფინანსებით 323 212 590 ლარის ღირებულების 1382 პროექტის განხორციელება იგეგმება, ინფრასტრუქტურის, სოციალური, ჯანდაცვის, ტურიზმის, განათლებისა და კულტურის მიმართულებით.

კონკრეტულად წელს კი, მხოლოდ რეგიონებში განსახორციელებელი პროექტების ფონდიდან, სამცხე–ჯავახეთის მუნიციპალიტეტებში, 19 033 533 ლარის ღირებულების, 38 პროექტია დაგეგმილი.

სამხარეო ადმინისტრაციის ცნობით, პრიორიტეტების მიხედვით ესენია: გზების რეაბილიტაციის 25 პროექტი, სასმელი წყლისა და საკანალიზაციო სისტემების რეაბილიტაციის 3 პროექტი. ამასთანავე, მხარის მუნიციპალიტეტებში დაგეგმილია სხვადასხვა სახის ინფრასტრუქტურული სამუშაოებიც, მათ შორის, სანიაღვრე კოლექტორისა და საყრდენი კედლების, მრავალსართულიანი საცხოვრებელი კორპუსების, დეკორატიული კედლებისა და ტურისტული ინფრასტრუქტურის მოწყობის, სოფლად გარე განათების სისტემების, საბავშვო ბაღების, ადმინისტრაციული შენობებისა და ახალგაზრდული ცენტრების მშენებლობა-რეაბილიტაცია.

[sknews.ge]