სამცხე-ჯავახეთის ეკონომიკურ პოტენციალს სამუშაო ჯგუფი შეისწავლის

სამხარეო ადმინისტრაციაში შეხვედრა გუშინ, სამ მაისს გაიმართა. საბჭოს წევრებმა დღის წესრიგით გათვალისწინებული სხვადასხვა საკითხები განიხილეს. მათ შორის იმსჯელეს მხარის მასშტაბით დასუფთავებისა და უსახურ შენობებთან დაკავშირებით გატარებულ ღონისძიებებზე. მოქალაქეთა სამხედრო აღრიცხვაზე აყვანისა და სავალდებულო სამსახურში გაწვევის მდგომარეობის, უპატრონო ძაღლების, პირუტყვის გადასარეკი ტრასებისა და საზაფხულო საძოვრებთან დაკავშირებული პრობლემატური საკითხების შესახებ.

როგორც სამხარეო ადმინისტრაციაში განგვიმარტეს რეგიონის ეკონომიკური პოტენციალის შემსწავლელ სამუშაო ჯგუფში შევლენ მუნიციპალიტეტების მერების მოადგილეები, ინფრასტრუქტურის სამსახურის წარმომადგენლები და სამხარეო ადმინისტრაციის სამსახურების ხელმძღვანელები: "აღნიშნული ჯგუფი შეისწავლის რეგიონის ეკონომიკურ პოტენციალს. განისაზღვრება პრიორტეტები და დაიგეგმება სამომავლო ღონისძიებები".

სხდომაზე მუნიციპალიტეტებში 9 მაისსა და 26 მაისს დაგეგმილი საზეიმო ღონისძიებების სამზადისის, ასევე ეთნიკური უმცირესობების წარმომადგენელ სტუდენტთა სტაჟირების პროგრამისა და საგანგებო სიტუაციებზე რეაგირების საკითხებიც განიხილეს.

სამხარეო საკონსულტაციო საბჭოს სხდომას გუბერნატორის მოადგილე გიორგი მიქელაძე, რეგიონული პროექტების კოორდინირების სამსახურის უფროსი მარინა გაჩეჩილაძე, ადგილობრივი თვითმმართველობის ორგანოებთან ურთიერთობის სამსახურის უფროსი ქეთევან მიშველიძე, მხარის მუნიციპალიტეტების მერები, საკრებულოს თავმჯდომარეები და მათი მოადგილეები ესწრებოდნენ .

შეგახსენებთ, რომ აღნიშნული საბჭო გუბერნატორთან არსებული საკონსულტაციო ორგანოა, რომელიც საქმიანობს საქართველოს ორგანული კანონის „ადგილობრივი თვითმმართველობის კოდექსით“ დადგენილი წესით. დებულების თანახმად საბჭო მინიმუმ სამ თვეში ერთხელ იკრიბება, წინა სხდომა მიმდინარე წლის 7 თებერვალს გაიმართა.

[sknews.ge]