სოფელ კლდესთან ავარია მსხვერპლით დასრულდა

სოფელ კლდესთან ავტოსაგზაო შემთხვევა დაახლოებით 12:00 საათისთვის მოხდა. მსუბუქი მარკის ავტომობილის მძღოლმა საჭე ვერ დაიმორჩილა, გზის სავალი ნაწილიდან გადავიდა და ამობრუნდა. ავტომანქანას სოფელ აწყურის მცხოვრები, 68 წლის ტარიელ ლ. მართავდა.

„მანქანაში მარტო თვითონ იჯდა. ავტომობილის ამობრუნების შემდეგ საკუთარი ფეხით გადმოვიდა მანქანიდან და გულმა დაარტყა“, – ამბობს ახალციხის მუნიციპალიტეტის გამგებლის რწმუნებული სოფელ აწყურში ელგუჯა ჯვარიძე.

მისი თქმით, გარდაცვლილი ტ. ლაბაძე წლების განმავლობაში ახალციხის მუნიციპალიტეტის სოფელ აწყურის საფუხბურთო გუნდის აქტიური წევრი იყო. დაეხმარება თუ არა გამგეობა გარდაცვლილის ოჯახს ამ ეტაპზე უცნობია.

საქართველოს შინაგან საქმეთა სამინისტროს ინფორმაციით, მომხდარზე ძიება სისხლის სამართლის კოდექსის 276–ე მუხლის მე–5 ნაწილით დაიწყო, რაც გულისხმობს ტრანსპორტის მოძრაობის უსაფრთხოების ან ექსპლუატაციის წესის დარღვევას, რამაც გამოიწვია ადამიანის სიცოცხლის მოსპობა. ისჯება თავისუფლების აღკვეთით ვადით ოთხიდან შვიდ წლამდე, თანამდებობის დაკავების ან საქმიანობის უფლების ჩამორთმევით ვადით სამ წლამდე.

[ვარლამ წიკლაური, ახალციხე]