სოფელ ბოლაჯურში 9 წლის ბავშვი ავტომანქანამ გაიტანა

ავტოსაგზაო შემთხვევა სოფელ ბოლაჯურში დღეს, 1 დეკემბერს მოხდა. როგორც ბოლაჯურის მცხოვრებლები ჰყვებიან, გოგონა ძმასთან ერთად სკოლიდან ბრუნდებოდა, რა დროსაც, სოფლის გზაზე, გადაჭარბებული სიჩქარით მოძრავი, „ნისანის“ მარკის მსუბუქი ავტომანქანა დაეჯახა.

„ჩვენ რომ მივედით, ბავშვი უკვე მკვდარი იყო. შემთხვევა თითქმის სოფლის ცენტრში, სკოლიდან 300-400 მეტრში მოხდა. ბავშვი შუა გზაზე არ ყოფილა გვერდზე გადასულა, მაგრამ მთვრალი იჯდა საჭესთან და მაინც დაეჯახა. შეჯახება იმდენად ძლიერი იყო, მანქანაც კი დაზიანდა“, - გვიყვება გარდაცვლილის ბიცოლა.

ადგილობრვების ნაამბობით, გოგონასთან ერთად მყოფი ძმა შემთხვევის შედეგად არ დაშავებულა.

ავტომანქანას იმავე სოფლის მცხოვრები 29 წლის ახალგაზრდა მართავდა. იგი სამართალდამცველებმა ადგილზე დააკავეს.

შინაგან საქმეთა სამინისტროს ინფორმაციით, საქმეზე გამოძიება სისხლის სამართლის კოდექსის 276-ე მუხლის მე-5 ნაწილით მიმდინარეობს. აღნიშნული მუხლი გულისხმობს ტრანსპორტის მოძრაობის უსაფრთხოების ან ექსპლუატაციის წესის დარღვევას, რამაც გამოიწვია ადამიანის სიცოცხლის მოსპობა. დანაშაული ისჯება თავისუფლების აღკვეთით ვადით ოთხიდან შვიდ წლამდე, თანამდებობის დაკავების ან საქმიანობის უფლების ჩამორთმევით ვადით სამ წლამდე.

[ლუბა გიორგაძე, ადიგენი]