‘შეიძლება შეცდომებს ჩვენ ვერ ვამჩნევთ და თქვენ დაინახოთ’, – ახალგაზრდული საკრებულოების მეორე ეტაპი

ქალაქ ახალციხისა და ახალციხის მუნიციპალიტეტის მასშტაბით შერჩეული ახალგაზრდები, გუშინ, 10 მარტს, ქალაქისა და თემის საკრებულოს თავმჯდომარეებს შეხვდნენ და ერთობლივი მუშაობის შესახებ შეთანხმდნენ.

„შეიძლება იმ შეცდომებს ჩვენ ვერ ვამჩნევთ და თქვენ დაინახოთ. კარგი იქნება ქალაქის საკრებულოს წევრების თანამშრომლობა ახალგაზრდა საკრებულოს წევრებთან“, –აღნიშნა შეხვედრისას ქალაქის საკრებულოს თავმჯომარემ დავით ლომიძემ.

თვითმმართველი თემის, ახალციხის მუნიციპალიტეტის საკრებულოს თავმჯდომარის, ასევე დავით ლომიძის თქმით, თაობებს შორის განსხვავებული შეხედულებები არსებობს და ამ ორი საკრებულოს თანამშრომლობა ამ კუთხითაცაა საინტერესო.

„ადამიანი, კანონი, თავისუფლების“ დირექტორმა ნიკოლოზ მაღალდაძემ ახალგაზრდებს მოუწოდა იაქტიურონ და თავიანთი იდეები შესთავაზონ ქალაქისა და თემის საკრებულოებს.

„ახალგაზრდული საკრებულო შექმნილია ახალგაზრდების განვითარებისთვის“, – აცხადებს ნიკოლოზ მაღალდაძე.

მისი თქმით, ახალგაზრდული საკრებულოები სამომავლოდ სოციალურ აქციებსა და საგანმანათლებლო პროექტებს გეგმავენ.

შეგახსენებთ, ახალგაზრდული საკრებულოები უკვე მეორედ აირჩიეს. პროექტში შერჩეული ახალგაზრდები ზუსტად ისევე იკავებენ გარკვეულ პოზიციებს, როგორც ეს საკრებულოშია გადანაწილებული.



[ვარლამ წიკლაური, ახალციხე]