დღეს საკრებულოები თვითმმართველი ქალაქის სტატუსის გაუქმებაზე იმსჯელებენ

ორივე სხდომა, თემშიც და ქალაქშიც, 15:00 საათზე გაიმართება და ორივე საკრებულოს განსახილველი მხოლოდ ერთი – თვითმმართველი ქალაქისა და თემის შეერთების საკითხი ექნება.

შეგახსენებთ, რომ რეგიონული განვითარების სამინისტროდან ახალციხის თემის და ქალაქის საკრებულოებმა, 15 მაისს წერილები მიიღეს. სამინისტრო საკრებულოებს სთხოვს თემისა და ქალაქის შეერთების საკითხი განიხილონ და თავიანთი პოზიცია აცნობონ.

წინასწარ ცნობილია რომ საკრებულოების თავმდჯომარეები ქალაქის სტატუსის გაუქმებას მხარს უჭერენ, ოპოზიციური ფრაქციები კი არა.

შეგახსენებთ

მთავრობა 12 თვითმმართველი ქალაქიდან შვიდისთვის სტატუსის გაუქმებას ფიქრობს. ეს ქალაქებია: ოზურგეთი, გორი, ამბროლაური, ახალციხე, თელავი და მცხეთა. მიზეზად ხარჯების დაზოგვას ასახელებენ.

"7 ქალაქისთვის თვითმმართველი ერთეულის სტატუსის გაუქმება, რეფორმის დეკლარირებული პრინციპებიდან გადახვევაა" – ფიქრობენ არასამთავრობო ორგანიზაციები, რომლებმაც, საქართველოს პარლამენტის თავმჯდომარესა და საქართველოს პრემიერ-მინისტრს მიმართვა გაუგზავნეს.

საზოგადოებრივი ორგანიზაციების მიერ გავრცელებული მიმართვის პასუხად, საქართველოს რეგიონული განვითარების სამინისტრომ ოფიციალური განცხადება გაავრცელა, რომელშიც ამ საკითხზე დაწყებული მსჯელობა დაადასტურა და არგუმენტები მოიყვანა.

[sknews.ge]