ახალგაზრდული საკრებულოების წევრები საკრებულოს მუშაობის სპეციფიკას გაეცნენ

პრექტი „ახალგაზრდული საკრებულო“ საქართველოს მასშტაბით 64 მუნიციპალიტეტში ხორციელდება. პროექტის ფარგლებში მაღალი აკადემიური მოსწრების მქონე მეთერთმეტე და მეთორმეტე კლასის მოსწავლეებს ტესტირება ჩაუტარდათ, რის საფუძველზეც მუნიციპალიტეტებში ახალგაზრდული საკრებულოები დაკომპლექტდა.

„ჩვენ თითოეულ მუნიციპალიტეტში გავმართეთ შეხვედრები და პროექტის პრეზენტაცია. ახალგაზრდული საკრებულო დაკომპლექტდა, იმ რაოდენობით, რა რაოდენობითაც არიან წარმოდგენილები მოქმედი საკრებულოს წევრები. საპრეზენტაციო შეხვედრებზე შევპირდით ახალგაზრდებს, რომ გავაცნობდით, როგორც მხარის გუბერნატორს, ასევე იმ საჯარო მოხელეებს, რომლებიც გარკვეულწილად ხელისშემწყობები იქნებიან იმ პროცესების, რომლებშიც ახალგაზრდები იქნებიან ჩართული“, – ამბობს არასამთავრობო ორგანიზაცია „ადამიანი, კანონი, თავისუფლებას“ აღმასრულებელი დირექტორი ნიკოლოზ მაღალდაძე.

ახალციხის მესამე საჯარო სკოლის სააქტო დარბაზში სამცხე–ჯავახეთის გუბერნატორს რეგიონის ოთხი მუნიციპალიტეტის, ახალციხის, ადიგენის ასპინძისა და ბორჯომის ახალგაზრდული საკრებულოს წევრები შეხვდნენ.

აკაკი მაჭუტაძის თქმით, პროექტი არამარტო ამ რეგიონისთვის, არამედ 64–ვე მუნიციპალიტეტისთვის მნიშვნელოვანია, რადგან მომავალი თაობა აიმაღლებს საზოგადოებრივ თვითშეგნებას, ეცოდინებათ, როგორ ირჩევა სხვადასხვა საჯარო მოხელე.

„ეს იქნება ცენზი მომავალი ცხოვრებისთვის, რომ ახალგაზრდები ჩამოყალიბდნენ და გადაწყვიტონ რა პროფესიას დაეუფლონ“, – ამბობს აკაკი მაჭუტაძე.

დარბაზში შეკრებილ მოსწავლეებს ბორჯომის მუნიციპალიტეტის საკრებულოს თავმჯდომარის მოადგილემ საკრებულოს მუშაობის სპეციფიკა გააცნო.

„მომავალში თუ ისინი გადაწყვეტენ, რომ საქმიანობა საკრებულოში გააგრძელონ, ეს პროექტი მათ მისცემს ძალიან დიდ გამოცდილებას“, – ამბობს გიორგი ფერაძე.

17 წლის ასპინძელი მაგდა ლონდარიძე, ფიქრობს, რომ აღნიშნული პროექტი ახალგაზრდებისთვის საკმაოდ ნაყოფიერი იქნება: „ყოველდღიური რუტინული შრომა სკოლაში არის მეტად დამღლელი, სამოქალაქო განათლების დონეზე ეს პროექტი თითოეულ ჩვენგანს ძალიან ბევრს მოგვცემს. ვფიქრობ, რომ ახალგაზრდებისთვის პიროვნული განვითარების კუთხით, ასევე მუნიციპალურ დონეზე, ადგილობრივი პრობლემების გადაწყვეტაში ჩვენ გარკვეულ როლს ვითამაშებთ“.

პროექტი ექვსთვიანია. ნიკოლოზ მაღალდაძის თქმით, მის ფარგლებში სხვადასხვა აქტივობებია დაგეგმილი.

„იქნება არაერთი ტრენინგი, როგორც ევროპასთან ინტეგრაციის თემაზე, ასევე არჩევნების მნიშვნელობაზე, კავკასიოლოგიის და ასე შემდეგ. ყველა ინფრასტრუქტურულ ღონისძიებაში ჩაერთვებიან ახალგაზრდები. დაგეგმილია გაცვლითი პროგრამებიც და ვფიქრობთ, რომ იმ ახალგაზრდებს, რომლებიც გამორჩეულები იქნებიან საკუთარი მოტივაციით და მიდგომით ამ პროექტისადმი, საზღვარგარეთ გავიყვანთ“, – ამბობს ნიკოლოზ მაღალდაძე.



[თამარ თოთაძე, ახალციხე]