‘ახალგაზრდული საკრებულოებისთვის’ ახალგაზრდებს არჩევენ

რესურსცენტრებთან მჭირდო თანამშრომლობის საფუძველზე მოსწავლეებს, რომლებიც არიან X, XI ან XII კლასებში და აქვთ მაღალი აკადემიური მოსწრება, ჩაუტარდებათ ტესტირება და მიეცემათ შანსი გახდნენ „ახალგაზრდული საკრებულოს“ წევრები.

„პროექტის „ახალგაზრდული საკრებულო 64 მუნიციპალიტეტში“ საშუალებით უამრავი განათლებული და ენერგიული ახალგაზრდა გამოიკვეთა. თითქმის ყველა მუნიციპალიტეტში მათ შეძლეს საკუთარი თავის წარმოჩენა და დამტკიცება იმისა, რომ მათში დიდი პოტენციალია. ჩვენს ორგანიზაციას ნამდვილად ეამაყება, რომ აღმოაჩინა და ასპარეზი მისცა ასეთ ახალგაზრდებს. დიდი სურვილი გვაქვს, რაც შეიძლება მეტმა ახალგაზრდამ წარმოაჩინოს საკუთარი თავი და ადგილობრივი ხელისუფლების წარმომადგენლებმა თავად დაინახონ თუ რამდენად ნიჭიერი და ენერგიული ახალგაზრდები არიან მათ მუნიციპალიტეტში და ხელი შეუწყონ მათ განვითარებას“ , - აცხადებს ორგანიზაციის თავმჯდომარე გიორგი ჭულუხაძე.

როგორც ორგანიზაციაში აცხადებენ, ახალგაზრდული საკრებულოების ხელახალი დაკომპლექტება მოსწავლეების უმაღლეს სასწავლებლებში ჩაბარებამ გამოიწვია.

გიორგი ჭულუხაძის განმარტებით, „ახალგაზრდული საკრებულოს“ წევრების ნაწილი, რომლებიც უნივერსიტეტებში ჩაირიცხნენ, გამოაკლდნენ პროექტს და ვეღარ აგრძელებენ მონაწილეობას, რადგან პროექტი მხოლოდ სკოლის მოსწავლეებზეა გათვლილი. აქედან გამომდინარე, თავისუფალი მანდატები ახალმა წევრებმა უნდა შეავსონ და ორგანიზაცია ახალგაზრდულ საკრებულოებს ახალი მოსწავლეებით დააკომპლექტებს.

თუმცა, იმ ახალგაზრდებისთვის, რომლებიც სტუდენტები გახდნენ, ახალი ეტაპი დაიწყება და ისინი მჭიდროდ იქნებიან ჩართულები ორგანიზაციის სხვადასხვა აქტივობებში.


„მათთვის მოეწყობა სემინარები და ტრენინგები ადამიანის უფლებების, სამართლის, არჩევნების, საერთაშორისო ურთიერთობების, თვითმმართველობებისა და ქვეყნის საკონსტიტუციო მოწყობის თემებზე, რაც მათ ანალიტიკური აზროვნების უნარს გამოუმუშავებს და განათლების დონეს კიდევ უფრო აუმაღლებს“, – აცხადებენ ორგანიზაციაში.

[sknews.ge]