ხანძარი წინუბანში – მელიქიძეებს საქონლის სადგომი, თივა და კურდღლები დაეწვათ

ახალციხის მუნიციპალიტეტის სოფელ წინუბანში ხანძარი დღეს, 9 მარტს, დაახლოებით 15:00 საათისთვის გაჩნდა. შემთხვევის დროს მელიქიძეების 4–სულიანი ოჯახი საქონლის სადგომთან ახლოს, ბოსტანში ხის ღობეს ამაგრებდა. კვამლი პირველმა მეზობლებმა შენიშნეს და სახანძრო–სამაშველო სამსახურს დაუკავშირდნენ.

საქონლის სადგომს ცეცხლი სავარაუდოდ ელექტროენერგიის სადენისგან გუჩნდა. ცეცხლი მალევე აალდა და სადგომში მოთავსებულ თივას წაეკიდა.

„მე ერთი რამე ვიცი, რომ არავის დაუწვია საქონლის სადგომი. პირველმა ჩვენ დავინახეთ და საშველად გამოვიქეცით. აქ ცეცხლს არავინ გააჩენდა, სადგომში ცეცხლი დენის სისტემისგან გაჩნდა“, – ამბობს მელიქიძეების მეზობელი მამუკა ქიმერიძე.

18 ძროხა, 10 ხბო და 1 ცხენი მელიქიძეების ოჯახს საძოვარზე ჰყავდა გაშვებული. ხანძრის გაჩენის დროს სადგომში მხოლოდ კურდღლები იყვნენ, მათმა ნაწილმა გაქცევა მოასწრო, ნაწილი კი ადგილზე დაიწვა. მთლიანად დაიწვა პირუტყვის საკვებად მომარაგებული თივა და სახლის ასაშენებელი ხის მასალა, რომელიც სადგომში ინახებოდა.

შემთხვევის ადგილზე სახანძრო–სამაშველო სამსახურის თანამშრომლებთან ერთად ექსპერტ–კრიმინალისტები რამდენიმე საათის განმავლობაში მუშაობდნენ. შემთხვევის ადგილზე იყო ახალციხი მუნიციპალიტეტის გამგებლის წარმომადგენელი სოფელ წინუბანში ელგუჯა ჯვარიძე.
გამგებლის წარმომადგენლის თქმით, გამგეობა ზარალს დაითვლის, რის შემდეგაც დაზარალებულ ოჯახს აუცილებლად დაეხმარებიან: „კანონის ფარგლებში ყველაფერში დავეხმარებით“.

ვიდრე ახალციხის მუნიციპალიტეტის გამგეობა მელიქიძეების ოჯახს დაეხმარება, 38 სულ საქონელს მელიქიძეები მეზობლის, მარინე გოგოლაძის სადგომში შეაფარებენ.

საქართველოს შინაგან საქმეთა სამინისტროში განმარტავენ, რომ მომხდარზე ძიება 187–ე მუხლის მე–2 ნაწილით დაიწყო, რაც გულისხმობს ნივთის დაზიანებას ან განადგურებას ცეცხლის წაკიდებით, აფეთქებით ან სხვა საყოველთაოდ საშიში საშუალებით.













[ვარლამ წიკლაური, ახალციხე]