წინუბანში საქონლის სადგომი იწვის

სოფელ წინუბანში მცხოვრები მელიქიძეების საქონლის სადგომს ცეცხლი დაახლოებით ნახევარი საათის წინ, 16:00 საათზე გაუჩნდა. ამ დროისთვის ოჯახის წევრები სახლში არ იმყოფებოდნენ, სახანძრო–სამაშველო სამსახური მეზობლებმა გამოიძახეს.

საქონლის სადგომიდან ცეცხლი იქვე მდებარე დენის ხის სვეტსაც მოედო, რის გამოც სვეტი მთლიანად ჩაიწვა, სოფელს კი ელექტროენერგიის მიწოდება შეუწყდა.

შემთხვევის ადგილზე სახანძრო სამსახური ჯერ ისევ მუშაობს. ხანძრის ჩაქრობაში მეხანძრეებს ადგილობრივებიც ეხმარებიან. მათი თქმით, საქონლის სადგომი მთლიანად დაიწვა, მეზობლებმა მხოლოდ ხბოების გამოყვანა მოასწრეს.

ბოლო ინფორმაციით, ადგილზე დამატებითი სახანძრო ჯგუფი გამოიძახეს.

შემთხვევის ადგილზე მუშაობენ სამართალდამცველებიც.

საქართველოს შინაგან საქმეთა სამინისტროში განმარტავენ, რომ მომხდარზე ძიება 187–ე მუხლის მე–2 ნაწილით დაიწყო, რაც გულისხმობს ნივთის დაზიანებას ან განადგურებას ცეცხლის წაკიდებით, აფეთქებით ან სხვა საყოველთაოდ საშიში საშუალებით.





[sknews.ge]