სოფელ იდუმალაში სახლის სახურავი დაიწვა

სოფელ იდუმალაში ხანძარი დღეს, 9 მარტს, დაახლოებით 14:00 საათზე მოხდა. ცეცხლი სახლის სახურავს მოედო.

„ვარაუდობენ, რომ სადენებიდან გაჩნდა ცეცხლი, ან შესაძლოა თივა მოხვდა სახურავზე და შემდეგ ნაპერწკალი გაღვივდა. პოლიცია აქ არის და დაადგენენ“, – ამბობს სოფელ იდუმალაში ასპინძის მუნიციპალიტეტის გამგებლის წარმომადგენელი თამაზ გიგაშვილი.

მისი თქმით, ოჯახი შეჭირვებულია: „ის რაც დაიწვა, მათთვის ძალიან ღირებულია, გამგეობა რაღაცით აუცილებლად დაეხმარება“.

როგორც სახანძო–სამაშველო სამსახურის საზოგადოებასთან ურთიერთობის სამსახურში აცხადებენ, ადგილზე ორი სამაშველო ჯგუფი მუშაობდა: „ამ დროისთვის ხანძარი ლიკვიდირებულია“.

საქართველოს შინაგან საქმეთა სამინისტროში განმარტავენ, რომ მომხდარზე ძიება 187–ე მუხლის მე–2 ნაწილით დაიწყო, რაც გულისხმობს ნივთის დაზიანებას ან განადგურებას ცეცხლის წაკიდებით, აფეთქებით ან სხვა საყოველთაოდ საშიში საშუალებით.

[თამუნა უჩიძე, ასპინძა]