ხანძრის შედეგად დაზარალებული მელიქიძეები დახმარებას ითხოვენ

ახალციხის მუნიციპალიტეტის სოფელ წინუბანში მცხოვრებ ოთხსულიან ოჯახს ხანძარმა საქონლის სადგომი და თივა გაუნადგურა. მელიქიძეებმა დახმარების თხოვნით გამგეობას 10 მარტს მიმართეს.

ადგილობრივ თვითმმართველობაში განმარტავენ, რომ მელიქიძეების განცხადებას სოციალური დახმარების მიზნობრივად გაცემის მიზნით შექმნილი სამუშაო ჯგუფი უახლოეს პერიოდში განიხილავს. რამდენი ლარით დაეხმარებიან დაზარალებულ ოჯახს, ჯერ გადაწყვეტილი არ არის.

ახალციხის მუნიციპალიტეტის საკრებულოს აპარატის მთავარი სპეციალისტი საზოგადოებასთან ურთიერთობის საკითხებში ნათია ყურმაშვილი განმარტავს, რომ გამგეობა მოქალაქეს საცხოვრებელი ფართის დაზიანების შემთხვევაში არაუმეტეს 2.000 ლარით ეხმარება, ხოლო არასაცხოვრებელი ფართის შემთხვევაში 500 ლარით.

შეგახსენებთ, ახალციხის მუნიციპალიტეტის სოფელ წინუბანში მცხოვრები მელიქიძეების ოჯახი ხანძარმა საქონლის სადგომის, პირუტყვის საკვების, კურდღლებისა და სახლის ასაშენებელი მასალის გარეშე დატოვა. ცეცხლი საქონლის სადგომს გაუჩნდა, შემთხვევას მსხვერპლი არ მოჰყოლია.

[თინათინ ზაზაძე, ახალციხე]