ხანძარი მესხეთის ქუჩაზე [Photo]

შემთხვევა დღეს, 6 მარტს, დაახლოებით ერთი საათის წინ, 15:00 საათზე მოხდა.

ცეცხლი მესხეთის ქუჩა N42–ში მცხოვრები შაქარჯიანების სამზარეულოში გაჩნდა. ამ დროის სამზარეულოში შაქარჯიანების შვიდსულიანი ოჯახის ერთ–ერთი წევრი, ბებია იმყოფებოდა.

სამზარეულო შაქარჯიანებს საცხოვრებელი ნაწილისგან ნახევრ მეტრში, ეზოში აქვთ აშენებული, სადაც ასევე სველი წერტილებია განთავსებული. ოჯახის დიასახლისის თქმით, რომელიც ამ დროს სახლში იმყოფებოდა, ცეცხლის ალი მეზობლემბმა შენიშნეს, მათვე გამოიძახეს სახანძრო სამსახური.

რამ გამოიწვია ხანძარი, ოჯახის წევრებს ამ ეტაპზე თქმა უჭირთ. დიასახლისის თქმით, ელექტოტექნიკა სამზარეულოში ჩართული არ ყოფილა, თუმცა, ენთო შეშის ღუმელი, რომლის საკვამური მილიც სახურავში ადის.

ადგილზე სახანძრო–სამაშველო სამსახურის სამი ჯგუფი მუშაობდა. მეხანძრეებმა ცეცხლის ლოკალიზება მალევე შეძლეს, თუმცა, შენობის სახურავი მთლიანად დაიწვა და განადგურდა სახურავში შენახული საოჯახო ინვეტნტარი. თავად შენობა წყლის ჭავლმა ჩარეცხა.

ადგილზე სახანძრო სამსახური ამ წუთებშიც რჩება. მეხანძრეები ცეცხლის ლიკვიდაციას ცდილობენ. შემთხვევის ადგილზე მობილიზებულია საპატრულო პოლიციაც.

საქართველოს შინაგან საქმეთა სამინისტროში განმარტავენ, რომ მომხდარზე ძიება 187–ე მუხლის მე–2 ნაწილით დაიწყო, რაც გულისხმობს ნივთის დაზიანებას ან განადგურებას ცეცხლის წაკიდებით, აფეთქებით ან სხვა საყოველთაოდ საშიში საშუალებით.

ხანძრის გამო ქალაქის ნაწილს ნახევარი საათით ელექტროენერგიის მიწოდება შეუწყდა. როგორც "სამხრეთის კარიბჭეს" "ენერგო–პრო ჯორჯიაში" განუცხადეს, დენის მიწოდება სახანძრო სამსახურის ზარის საფუძველზე შეწყდა. ამ დროისთვის ელექტროენერგიის მიწოდება აღდგენილია.















[ნინო ნარიმანიშვილი, ახალციხე]