ფეკალური მასა ღია არხებში და პირდაპირ მდინარეში

ახალციხე–ახალქალაქის გზატკეცილზე, ყოფილი სატყეო მეურნეობის მიმდებარე ტერიტორიაზე მცხოვრები მოსახლეობა დახმარებას ითხოვს. ადგილობრივები ამბობენ, რომ მათ ქუჩაზე საკანალიზაციო სისტემა მწყობრიდანაა გამოსული და ფეკალური მასა ქუჩაში იღვრება.
„კვირა არ გავა, რომ არ გაიჭედოს. მთელი ტერიტორია იტბორება. საშინელი სუნი და ანტისანიტარიაა. გარეთ ბავშვები ვერ გამოგვყავს“, – ამბობს ნანული გოგოლაური.

მისივე თქმით, ზაფხულში მდგომარეობა უარესდება: „კოღოები გვჭამენ, ისეთ დღეში ვართ, გარეთ ვერ გამოვდივართ. აქ ხალხს მიწები აქვს, მოსავალი მოჰყავს და ბაზარში ყიდის. დაბინძურებულ ტერიტორიაზე მოყვანილ პროდუქტს რომ გაყიდი, მყიდველს რა დაემართება“.
ნანული გოგოლაური ამბობს, რომ ამ ტერიტორიაზე დაახლოებით წელიწადნახევრის წინ დასახლდნენ, მათი გადმოსვლის შემდეგ, საცხოვრებლად კიდევ ორი ოჯახი გადავიდა.

დასახლებაში საკანალიზაციო სისტემა მხოლოდ რამდენიმე მეტრზეა გაკეთებული, ისიც სიძველის გამო მწყობრიდანაა გამოსული, დანარჩენ ტერიტორიაზე კი ფეკალური მასა ღია არხში მიედინება და მდინარე ფოცხოვში ჩადის.

ადგილობრივები ამბობენ რომ ამ ტერიტორიაზე „უნიმედი სამცხეს“ ახალციხის სამედიცინო დაწესებულების , სამცხე–ჯავახეთის სხელმწიფო უნივერსიტეტის და რუსთაველის ქუჩის კანალიზაციაა დაერთებული, გარდა ამისა აქ გადის კლინიკა „იმედის“ საკანალიზაციო სისტემაც.
ახალციხის მერიაში განმარტავენ, რომ ყოფილი სატყეო მეურნეობის მიმდებარე ტერიტორიაზე არცერთი ოჯახი ოფიციალურად დარეგისტრირებული არ არის.

„კანალიზაციის პრობლემას ჩვენ მაინც ვერ მოვუგვარებთ. ეს მოქალაქეები უნდა მოვიდნენ მერიაში, დარეგისტრირდნენ როგორც ჩვენი ქალაქის მაცხოვრებლები, მიენიჭოთ მისამართი. ამის შემდეგ მოგვმართონ ამ პრობლემით, გადავუგზავნით წყალმომარაგების კომპანიას, რომ აღნიშნულ მისამართზე არსებობს პრობლემა და ვთხოვთ მოუგვაროთ“, – ამბობს ახალციხის მერიის საორგანიზაციო სამსახურის უფროსი ეკა ბერიძე.
„საქართველოს გაერთიანებული წყალმომარაგების“ კომპანიაში განმარტავენ, რომ ღია საკანალიზაციო სისტემის მოწესრიგება მათ ვალდებულებაში არ შედის.

„ჩვენი ყველა კანალიზაცია გადის აზბესტ–ცემენტის მილებში. იქ არის დაახლოებით სამკილომეტრიანი მონაკვეთი, რომლიც არ არის ქალაქის ტერიტორიაზე. ეს არ არის კომპანის ბალანსზე. ამ ადამიანებმა ალბათ ადგილობრივ ხელისუფლებას უნდა მიმართონ“, – ამბობს „საქართველოს გაერთიანებული წყალმომარაგების კომპანიის“ საზოგადოებასთან ურთიერთობის სამსახურის უფროსი ნინო რამიშვილი.

მიუხედავად მისი განცხადებისა, ადგილობრივები აბობენ, რომ კომპანიის ცხელ ხაზზე რამდენჯერმე დარეკვის შემდეგ, კომპანიის ახალციხის სერვისცენტრიდან თანამშრომლები მივიდნენ და სისტემა გაწმინდეს, ადგილზე მიიტანეს ბეტონის რამდენიმე ჭაც.

მას შემდეგ კი რაც, თემით „სამხრეთის კარიბჭე“ დაინტერესდა, ადგილობრივებმა გვაცნობეს, რომ წყალომარაგების კომპანიის თანამშრომლებმა კანალიზაციის ღია ჭების დახურვა დაიწყეს.




[თინათინ ზაზაძე, ახალციხე]