ღია საკანალიზაციო ჭა ახალციხის ცენტრში [Photo]

ადგილობრივები ამბობენ, რომ ამ ადგილას ასფალტი დაახლოებით ორი თვის წინ ჩაინგრა.

„არავინ დაინტერესებულა რატომ არის ჩანგრეული ასფალტი, საშინელი სუნი დგას და ყველას აწუხებს“, – გვეუბნებიან ფოტო ატელიეში, რომელიც დაზიანებული საკანალიზაციო ჭის გვერდით მდებარეობს.

ახალციხის მერიაში ამბობენ, რომ ჯერ წყალმომარაგების კომპანიამ დაზიანებული საკანალიზაციო ჭა უნდა შეაკეთოს და შემდეგ ასფალტს თავად აღადგენენ.

„რამდენჯერმე შევეხმიანე ‘წყალკანალს’, რომ ჭის კედელია ჩამონგრეული და ეგ უნდა გააკეთონ, რომ ჩვენ ასფალტი მერე გადავაფაროთ, მაგრამ ისევ არავინ მისულა მაგის შესაკეთებლად ეტყობა“, – გვეუბნება მერიის ურბანული დაგეგმარებისა და საქალაქო მეურნეობის სამსახურის უფროსი გელვასი გელაძე.

საქართველოს წყალმომარაგების კომპანიის სამცხე–ჯავახეთის ფილიალში განმარტავენ, რომ აღნიშნულ ტერიტორიაზე საკანალიზაციო სისტემის დაზიანების შესახებ მათთან შეტყობინება არ შესულა და „სამხრეთის კარიბჭესგან“ შეიტყვეს.

„ჩვენთან ოფიციალური ინფორმაცია ამის შესახებ არ შემოსულა. ჩვენი ჯგუფი ხვალ დილითვე მივა შეამოწმებს და შეაკეთებს“,–გვითხრა საქართველოს წყალმომარაგების კომპანიის სამცხე–ჯავახეთის ფილიალის მენეჯერმა ბორის სპანდერაშვილმა.





[ლუბა გიორგაძე, ახალციხე]