თამარაშვილის ქუჩაზე მცხოვრებლები მერიისგან რეაგირებას ითხოვენ

მიუხედავად ადგილობრივების წინააღმდეგობისა, შპს „იაფის“ წარმომადგენლებმა საკანალიზაციო სისტემა თამარაშვილის N6–ში მდებარე საკანალიზაციო ჭაზე მაინც დააერთეს. ადგილობრივებმა დახმარების თხოვნით ახალციხის მერიას მიმართეს.

„კომისიას ველოდებით, ჩვენ ინჟინრები არ ვართ. წერილში დეტალურად აღვწერეთ ჩვენი ბინის სავალალო მდგომარეობა, რომ ძველი საკანალიზაციო სისტემის გამო ფეკალური მასა სარდაფში იღვრება და ახალ დატვირთვასვეღარ გაუძლებს. ასევე მერიას ბინის მდგრადობის შემოწმებას ვთხოვთ“, – განაცხადა N6–ბინაში მცხოვრებმა ნანა მურმანიშვილმა.

მისი თქმით, ზაფხულში მდგომარეობა უფრო რთულდება: „მწერები და ჭიები ამოდიან სარდაფიდან, ბავშვები რომ დაკბინონ, რა გვეშველება. გარდა ამისა, საშინელი სუნი და ანტისანიტარიაა. როგორც გავიგეთ, ზუბაშვილი მრავალსართულიანი სასტუმროს მშენებლობას გეგმავს, რასაც ეს სისტემა ვერ გაუძლებს“.

„სამხრეთის კარიბჭე“ ვითარების გასარკვევად ახალციხის მერიას დაუკავშირდა, თუმცა ვიცე მერმა ზაზა თამარაშვილმა ჩვენს სატელეფონო ზარებს არ უპასუხა.

აღნიშნულ საკითხზე მედიასთან მერის წარმომადგენელმა დავით სამსონიძემ ისაუბრა.

„განცხადებით როდესაც მოგვმართა ამ პიროვნებამ, გარკვევით წერია, რომ დაზიანებული საკანალიზაციო ქსელის რეაბილიტაციის ნებართვას ითხოვდა. აბა არ შეეცვალა და ედინა კანალიზაციას?! მერიამ გასცა ნებართვა გადაეთხარათ ასფალტი, დანარჩენი კანალიზაცია რა მდგომარეობაშია, როგორ მუშაობს, ეს უკვე გაარკვიეთ წყალმომარაგებაში. რაც შეეხება მოსახლეობას, ჩვენ წერილობით გავცემთ პასუხს “, – განაცხადა მერის წარმომადგენელმა დავით სამსონიძემ.

გაერთიანებული წყალმომარაგების კომპანიაში განმარტავენ , რომ აღნიშნულ საკითხთან მათ კომპანიას კავშირი არ აქვს.
„ჩვენ არანაირ სამუშაოებს არ ვახორციელებთ აღნიშნული ქსელი არ არის ჩვენს ბალანსზე“, – აცხადებს „წყალმომარაგების კომპანიის“ საზოგადოებასთან ურთიერთობის სამსახურის ხელმძღვანელი ნინო რამიშვილი.

შეგახსენებთ, რომ 7 ივლისს, თამარაშვილის ქუჩის მაცხოვრებლებმა მათ საკანალიზაციო სისტემაზე შპს „იაფის“ მაღაზიების კანალიზაციის დაერთება გააპროტესტეს, მიუხედავად პროტესტისა კომპანიის წარმომადგენლებმა სამუშაოები მაინც შეასრულეს.

შპს“იაფის“ ხელმძღვანელმა ჯუმბერ ზუბაშვილმა ადგილობრივებს ახალციხის მერიის მიერ მიღებული ნებართვა აჩვენა. ადგილობრივები კი აცხადებენ, რომ ზუბაშვილი ცრუობს და აქ მანამდე ძველი საკანალიზაციო სისტემა არ არსებობდა.

[თინათნ ზაზაძე, ახალციხე]