ახალციხის საკრებულოში მიწის დაკანონების კომისია ორმა წევრმა დატოვა

ახალციხის საკრებულოს მიწის დაკანონების კომისიაში თავმჯდომარე, ახალციხის მერიის ინფრასტრუქტურის სამსახურის უფროსი გელვასი გელაძე და ერთ–ერთი წევრი, ახალციხის საკრებულოს თავმჯდომარის მოადგილე თამარ გოგოლაძე აღარ ირიცხებიან.

იურიდიულ საკითხთა კომისიის თავმჯდომარე შალვა გოგოლაძე ამბობს, რომ გელვასი გელაძემ კომისიის დატოვების შესახებ განცხადება ჯანმრთელობის მდგომარეობის გაუარესების გამო დაწერა: „სამსახურშიც ვერ დადის და შესაბამისად ვერც კომისიაში იმუშავებდა. რაც შეეხება გოგოლაძეს, მიზეზი არ ვიცი“.

როგორც „სამხრეთს კარიბჭეს“ ახალციხის საკრებულოში განუცხადეს, გოგოლაძე მიწის საკუთრების კომისიის გარდა, კიდევ ოთხ კომისიაში იყო: „ეს მისთვის დიდი დატვირთვაა, ასევე, მას საკრებულოს თავმჯდომარის მოადგილის თანამდებობაც უკავია და ამიტომ გადაწყვიტა კომისიის შემადგენლობიდან გამოსულიყო“.

ახალციხის საკრებულო მიწის დაკანონების კომისიას უახლოეს სხდომაზე დაამტკიცებს. შალვა გოგოლაძის განმარტებით, შესაძლოა კომისიის შემადგენლობა ცხრა კაცამდე გაიზარდოს.

[თამუნა უჩიძე, ახალციხე]