კახა ბერიძემ ფრაქცია „ქართული ოცნება“ დატოვა

ფრაქცია „ქართული ოცნების“ დატოვების შესახებ კახა ბერიძემ საკრებულოს 4 აპრილს, მიმართა.

„ამ განცხადებას დაკმაყოფილება არ სჭირდება. ინფორმაციას ამის შესახებ საკრებულო ცნობად მიიღებს“, – ამბობს იურიდიულ საკითხთა კომისიის თავმჯდომარე შალვა გოგოლაძე.

ფრაქციის თავმჯდომარე მამუკა მიქელაძე ბერიძის განცხადებასთან დაკავშირების საქმის კურსში არაა: „ვერაფერს გეტყვით, ჩემამდე ჯერ არაფერი მოსულა. კლინიკაში ვარ“.

კომენტარის გაკეთებისგან თავს იკავებს ფრაქციის ერთ–ერთი წევრი და საკრებულოს თავმჯდომარე დავით ლომიძეც: „ჯერ არ ვიცი დანამდვილებით განცხადება დაწერა თუ არა“.

ფრაქციაში ამ დროისთვის ხუთი დეპუტატი, მამუკა მიქელაძე, სამველ ოვეიანი, ამბარცუმ ბაბოიანი, კობა გელაშვილი და დათო ლომიძე ირიცხება. ფრაქციას დაშლის საშიშროება არ ემუქრება.

„სამ კაცზე ნაკლები არ შეიძლება, რომ ფრაქციაში იყოს. აქ კი სამზე მეტია“, – ამბობს გოგოლაძე.

კახა ბერიძე საკრებულოში დეპუტატად, ასევე ჯანდაცვისა და სოციალურ საკითხთა კომისიის წევრად რჩება.

რატომ დატოვა ფრაქცია ბერიძემ და შესაძლოა თუ არა რომ მან აღნიშნული პოზიციებიც დატოვოს, ჯერ უცნობია.

შეგახსენებთ, რომ კახა ბერიძე საკრებულოს თავმჯდომარობიდან 2015 წლის 7 აგვისტოს გადადგა, ზუსტად ერთ თვეში, 7 სექტემბერს კი საფინანსო–საბიუჯეტო კომისია დატოვა.

[თამუნა უჩიძე, ახალციხე]