როდის აირჩევენ ახალციხის საკრებულოს თავმჯდომარეს

ახალციხის საკრებულოს თავმჯდომარის მოვალეობას თამარ გოგოლაძე ასრულებს. როდის და ვინ ჩაანაცვლებს კახა ბერიძეს საკრებულოს თავმჯდომარის პოზიციაზე უცნობია.

„ახალი საკრებულოს თავმჯდომარის არჩევის შესახებ საკრებულოს სხდომამდე წინასწარ გვეცოდინება. მინიმუმ სამი ადამიანი დაასახელებს თავმჯდომარეობის კანდიდატს“, – ამბობს გოგოლაძე.

შეკითხვაზე, რამდენად აქვს ოპოზიციას შანსი, რომ მათი კანდიდატი საკრებულოს თავმჯდომარე გახდეს, გოგოლაძე გვპასუხობს: „შანსი ყოველთვის არსებობს“.

არც საკრებულოს უმრავლესობა და არც უმცირესობა საკრებულოს თავმჯდომარეობის კანდიდატების ვინაობას არ ამხელს.

საკრებულოს ახალი თავმჯდომარის ასარჩევად საკრებულოში შესაძლოა რიგგარეშე სხდომა მოიწვიონ. წინააღდეგ შემთხვევაში საკრებულოს ახალ თავმჯდომარეს მომავალ სხდომაზე, დაახლოებით ერთ თვეში აირჩევენ.

„კანონში წერია, რომ საკრებულოს ახალი თავმჯდომარე მომავალ სხდომაზე უნდა აირჩიონ. არ წერია, რომ ეს პირველივე სხდომაზე უნდა მოხდეს, ამ ლოგიკით, ყველა სხდომა მომავალია“, – ამბობს იურიდიული კომისიის თავმჯდომარე შალვა გოგოლაძე.

შეგახსენებთ, ახალციხის საკრებულოს თავმჯდომარემ კახა ბერიძემ თანამდებობის დატოვების შესახებ 7 აგვისტოს ბიუროს სხდომაზე განაცხადა.

[თამუნა უჩიძე, ახალციხე]