შალვა გოგოლაძე იურიდიული კომისიის თავმჯდომარედ დააბრუნეს

შალვა გოგოლაძის დაბრუნების საკითხი საკრებულომ რიგგარეშე სხდომაზე განიხილა. სხდომას 15–დან 12 დეპუტატი ესწრებოდა. სხდომაზე სასამართლოს გადაწყვეტილება გოგოლაძის თანამდებობაზე დაბრუნებასთან დაკავშირებით დეპუტატებმა ცნობად მიიღეს და გოგოლაძე თანამდებობაზე აღადგინეს.

შეგახსენებთ, რომ შალვა გოგოლაძე, საკრებულოს იურიდიული კომიტეტის თავმჯდომარეობიდან, 2014 წლის 21 ნოემბერს, საკრებულოს რიგგარეშე სხდომაზე, დეპუტატებმა ხმათა უმრავლესობით გადააყენეს. გოგოლაძე თანამდებობიდან მას შემდეგ გადააყენეს, რაც ირაკლი ალასანიამ კოალიცია დატოვა. გოგოლაძე ამ დრომდე რჩება პარტიაში და ფიქრობს, რომ მას პოსტი სწორედ ამიტომ დაატოვებინეს.

ახალციხის რაიონულ სასამართლოს გოგოლაძემ 18 დეკემბერს, ადმინისტრაციული სარჩელით მიმართა. გოგოლაძე საკრებულოს 2014 წლის 21 ნოემბრის №48 განკარგულების ბათილად ცნობას ითხოვდა. სასამართლომ მისი სარჩელი ნაწილობრივ დააკმაყოფილა, ბათილად ცნო ის განკარგულება, რომლის საფუძველზეც გოგოლაძე კომიტეტის თავმჯდომარეობიდან გადააყენეს. სასამართლომ საკრებულოს დაავალა შალვა გოგოლაძისთვის, იძულებით განაცდურის ანაზღაურება, 4500 ლარით და ასევე, სასამართლომ გადაწყვიტა, რომ გოგოლაძე დაუყოვნებლივ აღადგინონ პოზიციაზე.

[sknews.ge]