ახალციხის ჰერალდიკის კომისიაში 4 ნამუშევარი შევიდა

ქალაქ ახალციხის მერიამ ქალაქის ჰერალდიკური სიმბოლოების გერბისა და დროშის შესაქმნელად კონკურსი 17 ივნისს გამოაცხადა. მონაწილეებს ნამუშევრები საკრებულოს აპარატში 2015 წლის 17 ივნისიდან 17 ივლისის ჩათვლით, სამუშაო დღეებში უნდა წარედგინათ. ქალაქ ახალციხის მუნიციპალიტეტის საკრებულოში განმარტავენ, რომ კომისიაში 4 განაცხადი შევიდა. ოთხივე მათგანი, 17 ივლისს სამუშაო საათების დასასრულს შევიდა.

ჰერალდიკის კომისიის თავმჯდომარე და საკრებულოს თავმჯდომარის მოადგილე თამარ გოგოლაძე ამბობს, რომ კომისიის სხდომა, სადაც აღნიშნულ ნამუშევრებს განიხილავენ, 21 ივლისს 12:00 საათზე დაინიშნა.

მისივე თქმით, ჰერალდიკის კომისიაში საკრებულოს ყველა წევრი შედის. ასევე სხდომაზე მოიწვევენ ქალაქ ახალციხის მერიის წარმომადგენლებს. რაც შეეხება ჰერალდიკის საბჭოს, თამარ გოგოლაძის თქმით, ისინი დაუკავშირდნენ საბჭოს, მაგრამ ფოლკლორის ეროვნული ფესტივალის მიმდინარეობის გამო მათი კომისიის სხდომაზე დასწრება ვერ ხერხდება.

"თუმცა, მათთან კონსულტაციის გარეშე არაფერს გადავწყვეტთ, რომ გავხსნით ამ ნამუშევრებს, დასკანერებულს გადავუგზავნით ჰერალდიკის საბჭოს", – ამბობს თამარ გოგოლაძე.

საბოლოოდ როდის გამოვლინდება გამარჯვებული ნამუშევარი, ამ დროისთვის უცნობია. ქალაქ ახალციხის მუნიციპალიტეტის ჰერალდიკური სიმბოლოების გერბისა და დროში შესაქმნელად საბოლოო ნამუშევარს ჰერალდიკის საბჭო დაამტკიცებს.

[თამარ თოთაძე, ახალციხე]