ახალციხის მერიის ‘მიწის კომისიას’ მამუკა მიქელაძე უხელმძღვანელებს

მიწის კომისიის ახალი თავმჯდომარის დანიშვნის შესახებ გადაწყვეტილება დეპუტატებმა, 1 ივლისის, საკრებულოს სხდომაზე მიიღეს. როგორც სხდომისას განმარტეს, ამ დრომდე, კომისიას მერის მოადგილე, ზაზა გელაძე ხელმძღვანელობდა. მან ეს პოზიცია პირადი განცხადების საფუძველზე დატოვა. მათივე ინფორმაციით, აღნიშნული კომისია ანგარიშვალდებულია ახალციხის საკრებულოს მიმართ, ამიტომ თავმჯდომარედ ისევ საკრებულოს წევრი დაინიშნა.

მამუკა მიქელაძის კანდიდატურას საკრებულოს სხდომაზე მხარი არ დაუჭირეს ოპოზიციური პარტიების წარმომადგენლებმა.

"უკეთესი იქნება, ამ კომისიაში ერთი წევრი ოპოზიციური პარტიიდან იყოს“, – განმარტა "გაერთიანებული დემოკრატიული მოძრაობის“ დეპუტატმა ჯიმშერ გოგოლაურმა.

"ამ საკითხს განვიხილავთ, მაგრამ ჩვენ პარიტეტის პრინციპი გვაქვს. ორი წარმომადგენელი უნდა იყოს საკრებულოდან, ორი – აღმასრულებელი ორგანოდან და ერთი მათგანი ქონების მართვის სააგენტოდან. ამჟამად, მერიის ერთი წევრის ადგილი თავისუფალია. თუ აღმასრულებელი ორგანო მოგვაწოდებს კანდიდატს, ჩვენ არ გვაქვს მაგის პრობლემა, რომ ოპოზიციური პარტია ჩავრთოთ ამ კომისიაში“, – განმარტავს ქალაქ ახალციხის საკრებულოს თავმჯდომარე დავით ლომიძე.

ამ დროისათვის, "საკრებულოს ფიზიკური და კერძო სამართლის იურიდიული პირების მფლობელობაში (სარგებლობაში) არსებულ მიწის ნაკვეთზე, საკუთრების უფლების აღიარების კომისიაში“ შემდეგი შემადგენლობაა:

მამუკა მიქელაძე – ქალაქ ახალციხის საკრებულოს ფრაქცია "ქართული ოცნების“ თავმჯდომარე;
სამველ ოვეიანი – საკრებულოს ურბანული დაგეგმარებისა და საქალაქო მეურნეობის საკითხთა კომისიის თავმჯდომარე;
გელა მერაბიშვილი – მერიის ურბანული მოწყობისა და საქალაქო მეურნეობის სამსახურის სივრცითი მოწყობის მთავარი სპეციალისტი;
მამუკა პარუნაშვილი – სსიპ სახელმწიფო ქონების ეროვნული სააგენტოს სამცხე–ჯავახეთის მომსახურების ცენტრის სპეციალისტი.

[თაკო ფეიქრიშვილი, ახალციხე]