”ოცნებას” ასპინძაში ოფისი ისევ არ აქვს

კოალიცია ”ქართული ოცნების” საარჩევნო შტაბები რეგიონის მასშტაბით ყველა მუნიციპალიტეტში გაუქმებულია. როდის გააგრძელებენ მუშაობას, ჯერ არცერთ მუნიციპალიტეტში არ იციან. სამცხე-ჯავახეთში არსებული შტაბების ხელმძღვანელებიდან სამომავლო გეგმებზე საუბარიც ჯერ ისევ ყველას უჭირს.

ასპინძის მუნიციპალიტეტში ”ქართული ოცნებას” შტაბი მარჯანიშვილის 6 ნომერში, ორსართულიან ბინაში ჰქონდათ გახსნილი.
ამავე ოფისში მდებარეობდა ახალგაზრდული ფრთის ოფისიც. ”ქართული ოცნების” წარმომადგენლებმა ნაქირავები ოფისი პირველი ნოემბრიდან დაცალეს და ინვენტარი მშენებარე რაგბის ბაზაზე შეინახეს.

ამ დროისათვის შტაბის ყველა წარმომადგენელს ხელშეკრულება შეწყვეტილი აქვს. თავდაპირველად, პირველ ნოემბრამდე შტაბიდან ყველა თანამშრომელი გაუშვეს, გარდა შტაბის ხელმძღვანელისა და სამი კოორდინატორისა. პირველი ნოემბრიდან კი ხელშეკრულება ყველა თანამშრომელს შეუწყდა.

- ”ჯერჯერობით არაფერი ვიცით, ველოდებით ცენტრალური შტაბიდან დირექტივებს. ამჟამად ყველაფერი გაუქმებულია”,-განმარტავს შტაბის ყოფილი ხელმძღვანელი მერაბ ზაქაიძე.


შენობა, სადაც "ოცნების" წევრები პერიოდულად იკრიბებიან.


ამჯამად ”ქართული ოცნების” აქტივისტები არაოფიციალურად, ადგილობრივი თვითმმართველობის შენობის მიდებარე ტერიტორიაზე, ორსართულიანი შენობის მეორე სართულზე, ერთ ოთახში იკრიბებიან. ამბობენ, რომ ოთახი ერთერთმა ახლობელმა ”ათხოვათ” და პერიოდულად, საჭიროების შემთხვევაში ამ ფართით სარგებლობენ.



ასპინძის მუნიციპალიტეტში კოალიცია ”ქართულ ოცნებას” საპარლამენტო არჩევნებზე 46 დამკვირვებელი ჰყავდა. ამათგან არცერთ დამკვირვებელს ხელფასი არ აუღია. შტაბის ყოფილი ხელმძღვანელის განმარტებით, დამკვირვებლებს ხელფასი ამ თვის ბოლომდე დაერიცხებათ.


[თინათინ ზაზაძე, ასპინძა]