”ქართული ოცნების” შტაბი კარავში

დღეს ადიგენის მუნიციპალიტეტში ”ქართული ოცნების” კოლონა დაახლოებით 16:00 საათისთვის შემოვიდა. კოალიციის ახალგაზრდული ფრთის წარმომადგენლები, ადიგენის, ახალციხის, ბორჯომისა და ასპინძის შტაბის წევრები შინაგან საქმეთა სამინისტროს ადიგენის რაიონული სამმართველოს გვერდით გაჩერდნენ. მათ აქ ადიგენის მუნიციპალიტეტში ”ქართული ოცნების” მაჟორიტარ კანდიდატთან ერთად კარავი დადგეს.

- ”შტაბი ვერ ფუნქციონირებდა ადიგენში აქამდე იმის გამო, რომ აუკრძალეს ხალხს ჩვენთვის მოექირავებინათ ოფისი. მაგრამ დღეიდან აქ გვექნება საველე შტაბი, თან პოლიციის გვერდით იმიტომ, რომ პოლიცია “დათარეშობს” ადიგენში და არ გვაძლევს მუშაობის საშუალებას”, - აცხადებს კოალიციის მაჟორიტარი კანდიდატი ბიძინა გუჯაბიძე.

მისივე თქმით, დღეიდან მთელი მსოფლიო გაიგებს იმ ამბავს, რომ ”საქართველოში ხელისუფლება როგორც ცენტრალური, ასევე ადგილობრივი, ატერორებს მოსახლეობას და პოლიტიკურ მოწინაღმდეგეს დევნის. ნახავთ, რომ ხვალ და ზეგ წამოვა ადამიანების ზღვა, რომლებიც გადალახავენ შიშს და ეს შიში ადიგენში ჩვენ დღეს დავამარცხეთ”.

ადიგენში კოალიციის შტაბის ხელმძღვანელის დავით ბაციკაძის განმარტებით, თვენახევარია ”ქართული ოცნება” ადიგენში შტაბის დაქირავებას ცდილობს, თუმცა ამაოდ: ”დილით პირობას მოგვცემენ, რომ მოგვაქიროან, მაგრამ საღამომდე დააშინებენ და უარს ამბობენ. ხალხს დავით მერაბიშვილი და გამგებელი სიმონ პარუნაშვილი აშინებს”.

მისივე განცხადებით, დაბა ადიგენში ოფისის ქირაობა ვერც მათივე აქტივისტების ბინებში მოხერხდა: ”დაბაში 15-მდე აქტიური წევრი გვყავს, მაგრამ აღმოჩნდა, რომ ბინა არცერთი მათგანის სახელზე არაა რეგისტრირებული”.

კოალიციის წარმოამდგენლებს ადიგენში არცერთი ადგილობრივი არ შეერთებია. არათუ მხარდამჭერები, შეკრებილებს ცნობისმოყვარეობის გამოც კი არ მიახლოებია არცერთი მოსახლე.

- ”ხალხს ნამდვილად ეშინია და იმიტომ არ არის აქ, იმიტომ ვერ გამოდის გარეთ და გვიახლოვდება. ამის დასტურია ისიც, რომ ვერცერთი ბინა ვერ გამოინახა შტაბის გასახსნელად. ადიგენში ერთი პიროვნებისთვის მიუციათ პირობა, რომ დაბაში ”ქართული ოცნება” შტაბს ვერ გახსნიდა და ასრულებენ კიდეც, თუმცა ფაქტია, რომ დღეს კარავი დაიდგა”, - აცხადებს კოალიცია ”ქართული ოცნების” ახალციხის შტაბის წევრი ნანა ჩიტორელიძე.



[თამუნა უჩიძე, ადიგენი]