”ქართულმა ოცნებამ” “კარდაკარი” მესხეთშიც დაიწყო

კოალიცია “ქართულ ოცნებას” შტაბი რეგიონის სამ მუნიციპალიტეტში, ბორჯომში, ასპინძასა და ახალქალაქში აქვს.

“ქართულ ოცნებას” ოფისი აქვს ახალციხეშიც, თუმცა, ჯერ აქ შტაბი არ ჩამოყალიბებულა. რაც შეეხება ადიგენსა და ნინოწმინდას, კოალიციას წარმომადგენლები ჰყავს, თუმცა ჯერ ოფისები არ გახსნილა.

ახალქალაქში ოფისი ათი დღის წინ გაიხსნა.

“რადგან ოფისი ახალი გახსნილია ჩვენ “კარდაკარის” კამპანიაში არ ჩავრთულვართ”, - განუცხადა “სამხრეთის კარიბჭეს” კოალიცია “ქართული ოცნების” ახალქალაქის ოფისის ხელმძღვანელმა გიორგი ჟვანიამ.

24 ივნისიდან 46 კაცი ამოწმებს ამომრჩეველთა სიებს ასპინძის მუნიციპალიტეტში. ოლქში 23 უბანია და თითოზე ორი კაცი მუშაობს.

“უზუსტობებთან დაკავშირებით ჯერ ვერაფერს გეტყვით. არის ხელისშეშლის მცდელობები, თუმცა ჯერ არც ამაზე საუბარი არ მსურს”, - აცხადებს ასპინძის შტაბის ხელმძღვანელი ტარიელ ივანიშვილი.

60 კაცია ჩართული ბორჯომის ოლქში. აქ ისინი 30 უბანს გადაამოწმებენ.

“ბაკურიანში ბორჯომის მუნიციპალიტეტის წევრი, დეპუტატი შავკანი ცდილობს ჩვენ წარმომადგენლებს ხელი შეუშალოს, ეუბნება, რომ უმჯობესი იქნება, თუ ამ საქმეს ჩამოცილდებიან, ასე ნაკლები პრობლმები შეექმნებათ”, - ამბობს ბორჯომის შტაბის საარჩევნო ადმინისტრაციის ხელმძღვანელი ბესო ფოფხაძე.

“კარდაკარის” კამპანია ორკვირაში დასრულდება.

"ქართული ოცნების" პრესსპიკერის მაია ფანჯიკიძის განცხადებით, "კარდაკარის" მიზანია ხმის უფლების მქონე პირების ფაქტობრივი მდგომარეობის გადამოწმება, საზღვარგარეთ მყოფი პირების გამოვლენა, მოწყვლადი ჯგუფების გამოვლენა, ამომრჩევლის მოსალოდნელი აქტივობის გაზომვა, ამომრჩევლის განწყობის გაზომვა, უმისამართო პირადობის მოწმობების მქონე ამომრჩევლების გამოვლენა და დუბლირებულ მისამართებზე მცხოვრები ამომრჩევლების გამოვლენა.

[თამუნა უჩიძე, ახალციხე]