სამცხე-ჯავახეთის პოლიციის დეპარტამენტის დირექტორი თეიმურაზ კალანდაძეშინაგან საქმეთა სამინისტროში „სამხრეთის კარიბჭეს“ დაუდასტურეს, რომ თეიმურაზ კალანდაძემ განცხადება ნამდვილად დაწერა. მეტიც, სამინისტროში განგვიმარტეს, რომ კალანდაძე გამონაკლისი არ არის: „მინისტრის მიერ დაანონსებული საკადრო ცვლილებები მიმდინარეობს. ყველა რეგიონის პოლიციის დეპარტამენტის დირექტორებმა რეორგანიზაციის გამო დაწერა განცხადება გათავისუფლებასთან დაკავშირებით“.
შსს-ს ინფორმაციით, შინაგან საქმეთა მინისტრი გიორგი მღებრიშვილი რეგიონების პოლიციის დეპარტამენტების დირექტორებს გუშინ, 14 იანვარს შეხვდა და პირველი მოადგილე ბესიკ ამირანაშვილი წარუდგინა.
„შეხვედრაზე მინისტრმა, მოადგილესთან ერთად, რეგიონებში არსებული ვითარების შესახებ ანგარიში ჩაიბარა. გიორგი მღებრიშვილმა პრიორიტეტული მიმართულებები განიხილა და დეპარტამენტების უფროსებს სამუშაო პროცესთან დაკავშირებით ახალი დავალებები მისცა. როგორც ბესიკ ამირანაშვილმა თავის პირველ სამუშაო შეხვედრაზე აღნიშნა, მისთვის მნიშვნელოვანია რეგიონების პოლიციის დეპარტამენტების უფროსებთან კოორდინირებული მუშაობა და დანაშაულის წინააღმდეგ ბრძოლის ერთობლივი სტრატეგიის შემუშავება“, - ვკითხულობთ საქართველოს შინაგან საქმეთა სამინისტროს ვებგვერდზე.
შეგახსენებთ, რომ თეიმურაზ კალანდაძე სამცხე-ჯავახეთის პოლიციის დეპარტამენტის დირექტორად (მაშინ უწყებას შსს-ს სამცხე-ჯავახეთის სამხარეო სამმართველო ერქვა)
2013 წლის 26 ნოემბერს დაინიშნა.
სამხარეო პოლიციის დეპარტამენტის დირექტორის სახელს არაერთი გახმაურებული საქმე უკავშირდება. სხვადასხვა დროს, სხვადასხვა საქმეში ბრალდებულები და მათი ახლობლები მას ცემასა და მუქარაში ადანაშაულებენ. მათ შორისაა ახალქალაქის მუნიციპალიტეტის სოფელ გოგაშენში მცხოვრები დედა-შვილის საქმე. ესენი არიან სოფელ გოგაშენში ორმაგ მკვლელობაში მსჯავრდებულის გენადი იაკობაძის და და დისშვილი, რომლებიც აცხადებენ, რომ „
სამხარეოს უფროსმა მათ წიხლები ურტყა და გაუპატიურებით ემუქრებოდა“. ასევე, სხვებთან ერთად თეიმურაზ კალანდაძესაც ადანაშაულებდა ცემაში იარაღის უკანონო შენახვა–ტარებაში მსჯავრდებული გიორგი კაპანაძე. იგი ამბობს, რომ დაკავებისასკალანდაძემ სახეში
ჯერ წიხლი, შემდეგ კი სასმელი წყლის „სნოს“ ბოთლი ჩაარტყა. კალანდაძე არ დაუსახელებია, თუმცა ასევე სამხარეო სამმართველოში არაადამიანურ მოპყრობაზე საუბრობდა მკვლელობაში ჯერ ბრალდებული, შემდეგ კი გამართლებული სერგეი ბაბოიანი. იგი
ამბობს, რომ სამმართველოში ძაღლივით აყმუვლეს.
ყველა ამ საქმეზე, და არამხოლოდ ამ საქმეებზე, პროკურატურას ძიება აქვს დაწყებული სისხლის სამართლის კოდექსის 333-ე მუხლით. ჯამში, 2014 წლის ივლისიდან 2015 წლის ოქტომბრამდე (ამის შემდეგ „სამხრეთის კარიბჭეს“ მონაცემები აღარ გამოუთხოვია) სამცხე–ჯავახეთში სამართალდამცველების მიერ უფლება–მოსილების შესაძლო გადამეტების ფაქტზე (333-ე მუხლი) პროკურატურამ ძიება
27 საქმეზე დაიწყო და 6–ზე სისხლის სამართლის ნიშნების არ არსებობის გამო შეწყვიტა.
[ნინო ნარიმანიშვილი, ახალციხე]