საჯარო მოხელესთან ერთად, 80 წლის ანა ბაბოევას მკვლელობაში ყოფილი ბრალდებული სერგეი ბაბოიანი აცხადებს, რომ იგი სამართალდამცავებმა დაკავების დღეს, 16 თებერვალს, სამცხე-ჯავახეთის სამხარეო მთავარ სამმართველოში სცემეს. ამ დღეს სამართალდამცავები მკვლელის მიგნებას ცდილობდნენ.
„დომინოს ვთამაშობდი სოფელში რომ მითხრეს, პოლიცია გეძახისო. მივედი ჩავჯექი მანქანაში და საავადმყოფოსთან რომ სამმართველოა, იქ წამიყვანეს. დაახლოებით დღის სამი საათი იქნებოდა“, - იხსენებს ბაბოიანი.
მას ზუსტად არ ახსოვს რომელ სართულზე აიყვანეს: „მეორე იყო თუ მესამე სართული, ხელმარცხნივ შემიყვანეს. იქ მარცხნივ პატარა ოთახი იყო, მარჯვნივ დიდი. დიდ ოთახში მაგიდაზე ბოთლებით წყალი ეწყო“.
აქ ბაბოიანი დასაკითხად შეიყვანეს. როგორც თავად ამბობს, ოთახში ძირითადად სამი პირი იყო, სხვები შედიოდნენ და გამოდიოდნენ, პოლიციის ფორმა არცერთ მათგანს ეცვა.
„ცემა დამიწყეს, ჯერ სახეზე და მერე გულმკერდზე ფეხსაცმლის ქუსლი მირტყეს, ფეხებშიც მირტყამდნენ. სახეზე სისხლი მდიოდა. მერე თავზე წყალი დამასხეს, რომ მოვსულიერებულიყავი“, - ამბობს ბაბოიანი.
მისი თქმით, ამის შემდეგ იგი იატაკზე პირქვე დააწვინეს, ხელები გააშლევინეს და თითებზე ფეხებით შედგნენ: „მეუბნებოდნენ აღიარეო. რა უნდა ვაღიარო, არაფერი ვიცი–მეთქი. მაშინ ის თქვი, ვინ მოკლაო. ვეუბნებოდი, არც ეგ ვიცი ვისი გაკეთებულია–მეთქი“.
ამის შემდეგ ბაბოიანი საპირფარეშოში გაიყვანეს და პირიდან სისხლი მოაბანინეს, თუმცა, მისი თქმით, მასზე ძალადობა ამით არ დასრულებულა: „მუხლებზე დამაყენეს, ხელებიც დადეო მითხრეს, მერე მითხრეს იარეო, ვიარე ეგრე, მერე მითხრეს: იყეფეო, დავიყეფე. ოთხზე დავდექი, მუხლებზე და ხელებზე, დავდიოდი და თან ვყეფდი. მაგიდაზე ცარიელი ნახევარლიტრიანი ბოთლი იდო, ჩააგდეს ძირზე ერთი ხუთჯერ და აიღეო მითხრეს. ხელით დავწვდი რომ ამეღო, ხელებით არა, პირითო. იმის ნებაც არ მომცეს ხელებით „პოლს“ დავყრდნობოდი და ისე ამეღო. მუხლებით იყავი და პირით ისე აიღეო. მერე ერთმა თქვა, სირცხვილია ბიჭო რას აკეთებ, მამაშენის ტოლიაო და ამის შემდეგ ასეთი რაღაცა აღარ გამიკეთეს“.
ბაბოიანის ადვოკატის ირაკლი ბარძიმაძის თქმით, მისი დაცვის ქვეშ მყოფი 16 თებერვალს დააკავეს, თუმცა, დაკავება 17 თებერვალს გააფორმეს. თუმცა, ვიდრე ბაბოიანის, როგორც მკვლელობაში ბრალდებულის სასამართლო პროცესები დაიწყებოდა, მისი ცემის ფაქტზე გამოძიება მანამდე დაიწყეს. გამოძიება რომ მიმდინარეობს, ეს „სამხრეთის კარიბჭეს“ სამცხე-ჯავახეთის საოლქო პროკურატურაშიც დაუდასტურეს.
ადვოკატის განმარტებით, საქმეში დევს როგორც ბრალდების მხარის, ასევე, დაცვის მხარის მიერ ჩატარებული სასამართლო სამედიცინო ექსპერტიზის დასკვნა. ბარძიმაძის განცხადებით, დაცვის მხარის ექსპერტიზის დასკვნაში, რომელიც დოკუმენტების მიხედვით ჩატარდა, წერია, რომ დაზიანებები მიღებული აქვს იმ პერიოდში, როცა ის პოლიციაში იყო: „რადგან ბაბოიანს დაზიანებები ჰქონდა, იგი იზოლატორმა შემოწმების გარეშე არ მიიღო. ამიტომ დოკუმენტში დეტალურადაა აღწერილი სად რა ფორმის და ხარისხის დაზიანება მიიღო“.
მისივე თქმით, საქმეში არსებული ბრალდების მხარის ექსპერტიზის დასკვნის მიხედვით, ბაბოიანისთვის მიყენებული დაზიანებები მკვლელობის დღეს (8 თებერვალს) ემთხვევა, და არა იმ პერიოდს, როცა ის დააკავეს.
„ბაბოიანმა დეტალურად აღწერა იმ პოლიციალების გარეგნობა, ვინც სცემა. თმის ფერი, და ა.შ. ამოცნობა ჯერ არ ჩატარებულა, გამოძიება გრძელდება. ჯერ ჩვენც ვერ ვაქტიურობთ, რადგან მას ჯანმრთელობის პრობლემები აქვს, გულის ოპერაცია უნდა გაიკეთოს და დაკითხვებზე სიარულის თავი არ აქვს“, - ამბობს ბარძიმაძე და ამატებს, რომ ამ საქმის გამოძიება არ გვიანდება, რადგან მას ხანდაზმულობა 15 წელი აქვს.
საქმეს სამცხე-ჯავახეთის საოლქო პროკურატურა სსკ-ის 333-ე მუხლით იძიებს, რაც სამართალდამცავების მხრიდან უფლება-მოსილების შესაძლო გადამეტებას გულისხმობს. თუმცა, როგორც ბარძიმაძე ამბობს, ეს არაადამიანური მოპყრობაა და არა უფლებამოსილების გადამეტება.
მისივე თქმით, დიდი ალბათობით, დანაშაულის ჩამდენები ხელმძღვანელი პირები არიან: „თანამდებობის პირები თითქმის არასდროს მინახავს პოლიციის ფორმაში, ყოველთვის სამოქალაქო ფორმით დადიან. თუმცა, ხშირად სამოქალაქო ფორმა შეიძლება რიგით გამომძიებელსაც ეცვას“.
შინაგან საქმეთა სამინისტროში ცემისა და არაადამიანური მოპყრობის ფაქტს კატეგორიულად უარყოფენ. „სამხრეთის კარიბჭე“ შინაგან საქმეთა სამინისტროს გასულ კვირას, იქამდე დაუკავშირდა, ვიდრე „სამხრეთის კარიბჭეს“ ირგვლივ ვითარება დაიძაბებოდა და შსს ურთიერთობის ფორმას დააწესებდა. (მასალის გამოქვეყნებაც ამ ცნობილი მოვლენების გამო დაგვიანდა).
„ცემას ადგილი არ ჰქონია, ასეთი რამ არ ყოფილა, მითუმეტეს კალანდაძე (სამცხე-ჯავახეთის სამხარეო მთავარი სამმართველოს უფროსი) იქ მაგ დღეს არ ყოფილა“, - განუცხადა „სამხრეთის კარიბჭეს“ შსს საზოგადოებასთან ურთიერთობის სამსახურის წარმომადგენელმა ეკატერინე ათოშვილმა.
[თამუნა უჩიძე, ახალციხე]