პრეზიდენტმა პარლამენტს კვირიკაშვილის კანდიდატურა დასამტკიცებლად წარუდგინა

"მოგახსენებთ, რომ შემოსულია საქართველოს პრემიერ-მინისტრის კანდიდატურა, რომელიც მე უკვე გადავაგზავნე პარლამენტში დასამტკიცებლად, რათა არ შეიქმნას შეფერხება, ამდენად ამ ორი-სამი დღის განმავლობაში მე მხარი დავუჭირე, როგორც პრემიერ-მინისტრის გადადგომას, ასევე ახალი პრემიერ-მინისტრის კანდიდატურის წარდგენას, ახლა უკვე ჯერი საქართველოს პარლამენტზეა", - განაცხადა გიორგი მარგველაშვილმა.

შეგახსენებთ, დღეს, 25 დეკემბერს გამართულ საპარლამენტო უმრავლესობის სხდომაზე, უმრავლესობა პრემიერ-მინისტრობის პოსტზე პრეზიდენტისთვის გიორგი კვირიკაშვილის კანდიდატურის წარდგენაზე შეთანხმდა.

სხდომაზე პრემიერ-მინისტრობის კანდიდატად გიორგი კვირიკაშვილსა და პრემიერ-მინისტრობის მოვალეობის შემსრულებელა ირაკლი ღარიბაშვილს ხვდებოდნენ.

საქართველოს კონსტიტუციის თანახმად, პრემიერ-მინისტრობის კანდიდატმა, ასევე შვიდი დღის ვადაში უნდა შეარჩიოს მინისტრების კანდიდატურები და ნდობის გამოცხადებისთვის საქართველოს პარლამენტს წარუდგინოს. პარლამენტმა გადაწყვეტილება 7 დღის ვადაში უნდა მიიღოს.

მთავრობისათვის პარლამენტის ნდობის მისაღებად პარლამენტის სიითი შემადგენლობის უმრავლესობის მხარდაჭერაა საჭირო. ნდობის გამოცხადების შემთხვევაში, პრეზიდენტი 2 დღის ვადაში დანიშნავს პრემიერ-მინისტრს და ასევე 2 დღის ვადაში პრემიერი მინისტრთა კაბინეტის შემადგენლობას.

ასევე შეგახსენებთ, რომ მთავრობაში საკადრო ცვლილებები მას შემდეგ დაიწყო, რაც უკვე ყოფილი პრემიერი ირაკლი ღარიბაშვილი თანამდებობიდან გადადგა.

დღეს გამართული სხდომის შემდეგ, ჟურნალისტებთან საუბრისას ირაკლი ღარიბაშვილს გადადგომის მიზეზები აღარ განუმარტავს, იმ მოტივით, რომ „მის გამოსვლაში გამოსვლაში ყველაფერი იყო აბსოლუტურად ნათელი. ამ გადაწყვეტილებაზე დიდხანს ფიქრობდა და სწორად შეარჩია ამ გადაწყვეტილების გამოცხადების დრო“.

დღეს მან სამომავლო გეგმებზე პირველი კომენტარიც გააკეთა.

ახლა ვაპირებ, რომ უბრალოდ დავისვენო და დანარჩენს დრო გვიჩვენებს”, – განაცხადა ირაკლი ღარიბაშვილმა.

[ნინო ნარიმანიშვილი, ახალციხე]