პარლამენტში მინისტრთა კაბინეტის წევრების მოსმენა განახლდება

დღეს, ქუთაისის სასახლეში, მინისტრობის კანდიდატები თავდაპირველად ფრაქცია “საქართველოს პატრიოტებს“ შეხვდებიან, შემდეგ კი, მოსმენა საპარლამენტო უმცირესობისა და უმრავლესობის ფორმატში გაგრძელდება.

დღესვე, 12:00 საათზე, პარლამენტის რიგგარეშე სხდომა გაიმართება, სადაც კენჭისყრაზე მთავრობისა და სამთავრობო პროგრამისათვის ნდობის გამოცხადების საკითხი დადგება. პარლამენტის რიგგარეშე სხდომის მოწვევის განკარგულება პრეზიდენტმა უკვე გამოსცა.

საქართველოს კონსტიტუციის 61-ე მუხლის მე-2 პუნქტის შესაბამისად, მოწვეულ იქნეს საქართველოს პარლამენტის რიგგარეშე სხდომა 2016 წლის 26 ნოემბრის 12 საათიდან შემდეგი დღის წესრიგით - საქართველოს მთავრობის შემადგენლობისა (N07-2/1, 22.11.2016) და სამთავრობო პროგრამის „თავისუფლება, სწრაფი განვითარება, კეთილდღეობა. სამთავრობო პროგრამა 2016-2020 წ.“ განხილვა და საქართველოს მთავრობის შემადგენლობისათვის ნდობის გამოცხადება“, - ნათქვამია პრეზიდენტის განკარგულებაში.

მინისტრობის კანდიდატების მოსმენა პარლამენტის კომიტეტების ფარგლებში გუშინ დაიწყო.


[sknews.ge]