საპარლამენტო უმრავლესობამ პრემიერობის კანდიდატად პრეზიდენტს გიორგი კვირიკაშვილი წარუდგინა

სხდომაზე პრემიერ-მინისტრობის კანდიდატად გიორგი კვირიკაშვილსა და პრემიერ-მინისტრობის მოვალეობის შემსრულებელა ირაკლი ღარიბაშვილს ხვდებოდნენ.

სხდომის დასრულების შემდეგ, ირაკლი ღარიბაშვილმა განაცხადა, რომ საპარლამენტო უმრავლესობამ ღირსეული კანდიდატი შეარჩია: „ბატონი გიორგი არის ჩემი მეგობარი, ჩვენ დიდხანს ვმუშაობდით ერთად, სანამ პოლიტიკაში მოვიდოდით. მინდა ვუსურვო წარმატებები ბატონ გიორგის, მის გუნდს”.

საქართველოს პარლამენტის თავმჯდომარემ დავით უსუფაშვილმა ირაკლი ღარიბაშვილს გაწეული საქმიანობისთვის მადლობა გადაუხადა.

„მე მინდა მიმავალ პრემიერ-მინისტრს, ჩემს მეგობარ ირაკლის დიდი მადლობა მოვახსენო გაწეული საქმიანობისთვის პრემიერ-მინისტრობის პოსტზე, მინისტრად მუშაობის დროს, ოპოზიციაში ერთად დგომისთვის. დარწმუნებული ვარ, ჩვენ წინ კიდევ ძალიან ბევრ საქმეს ერთად გავაკეთებთ“, – განაცხადა დავით უსუფაშვილმა და აქვე, მომავალ საქმიანობაში წარმატება უსურვა პრემიერ-მინისტრობის კანდიდატ გიორგი კვირიკაშვილს.

„დარწმუნებული ვარ, რომ უახლოეს დღეებში ძალიან დიდი შრომა იქნება გაწეული იმისთვის, რომ ჩვენ დავასრულოთ ეს პროცესი და ახალ წლამდე საქართველოს ჰყავდეს ახალი მთავრობა. გიორგი კვირიკაშვილი არის ჩვენი გუნდის ძალიან აქტიური წევრი პირველი დღიდან დღემდე. საქართველოს საპარლამენტო უმრავლესობა მას სრულ ნდობას უცხადებს და მე დარწმუნებული ვარ, პარლამენტი როგორც ინსტიტუტი, მას ნდობას გამოუცხადებს და იგი ამ ძალიან საპასუხისმგებლო თანამდებობაზე კიდევ უფრო წინ წაიყვანს ჩვენს ქვეყანას", – განაცხადა დავით უსუფაშვილმა.

[ნინო ნარიმანიშვილი, ახალციხე]