ირაკლი ღარიბაშვილმა პრემიერ-მინისტრის თანამდებობა დატოვა

"მე დღეს ვტოვებ თანამდებობას, მაგრამ ვრჩები ჩემი სამშობლოს ერთგულ ჯარისკაცად, ღმერთი იყოს ჩვენი სამშობლოს, ჩვენი ძლიერი და ამაყი ქართველი ერის მფარველი!" – განაცხადა ირაკლი ღარიბაშვილმა მთავრობის ადმინისტრაციაში გამართულ სპეციალურ ბრიფინგზე, რომელსაც მედია არ დასწრებია.

შეგახსენებთ, მისი გადადგომის შესახებ ინფორმაცია დღეს დილიდან ვრცელდებოდა. დილით მთავრობის კანცელარიაში განაცხადეს, რომ პრემიერი გადადგომას არ აპირებდა თუმცა, საღამოს ეს ინფორმაცია აღარ უარყვეს.

ირაკლი ღარიბაშვილმა საქართველოს პრემიერ-მინისტრის პოსტი 2013 წლის წლის 20 ნოემბერს დაიკავა, იქამდე, 2012 წლის 25 ოქტომბრიდან 2013 წლის 20 ნოემბრის ჩათვლით, იგი შინაგან საქმეთა მინისტრი იყო.

პოლიტიკაში გამოჩენამდე, 2004–2005 წლებში, ირაკლი ღარიბაშვილი "ქართუ ჯგუფის" კომპანია "ბურჯში" მუშაობდა. 2005-2008 წლებში იყო სააქციო საზოგადოება "ქართუ ჯგუფის" პრეზიდენტის თანაშემწე. 2006 წლიდან 2012 წლის 14 თებერვლამდე იყო საერთაშორისო საქველმოქმედო ფონდ "ქართუს" გამგეობის თავმჯდომარე. 2006 წელს ირაკლი ღარიბაშვილი იყო საქართველოში სან-მარინოს რესპუბლიკის საპატიო კონსულის პირადი წარმომადგენელი. 2007-2012 წლებში იყო სააქციო საზოგადოება "ბანკი ქართუს" სამეთვალყურეო საბჭოს წევრი.

აქვე შეგახსენებთ, რომ საქართველოს კონსტიტუციის თანახმად, პრემიერ-მინისტრის თანამდებობიდან გადადგომის გამო უფლებამოსილება მინისტრებსაც შეუწყდათ. საპარლამენტო უმრავლესობის მხრიდან შეთავაზებული პრემიერ-მინისტრობის კანდიდატი საქართველოს პრეზიდენტმა შვიდი დღის ვადაში უნდა წარადგინოს; თავის მხრივ, ასევე შვიდი დღის ვადაში, პრემიერ-მინისტრობის კანდიდატი მინისტრთა კანდიდატურებს შეარჩევს და ნდობის მისაღებად პარლამენტს წარუდგენს. პარლამენტსაც შვიდღიანი ვადა აქვს გადაწყვეტილების მისაღებად.

[ნინო ნარიმანიშვილი, ახალციხე]