ირაკლი ღარიბაშვილი საგანგებო განცხადებას გააკეთებს

ამის შესახებ ინფორმაციას საქართველოს მთავრობის ადმინისტრაციის პრესსამსახური ავრცელებს. რას შეეხება პრემიერის განცხადება, ამ ეტაპზე უცნობია.

შეგახსენებთ, დღეს დილიდან ვრცელდება ინფორმაცია პრემიერ–მინისტრის შესაძლო გადადგომის შესახებ, თუმცა, დილითვე მთავრობის კანცელარიაში განაცხადეს, რომ პრემიერი გადადგომას არ აპირებს.

აქვე შეგახსენებთ, რომ საქართველოს კონსტიტუციის თანახმად, პრემიერ-მინისტრის თანამდებობიდან გადადგომის შემთხვევაში უფლებამოსილება მინისტრებსაც შეუწყდებათ. მთავრობის უფლებამოსილების შეწყვეტის შემთხვევაში, საქართველოს პრეზიდენტმა შვიდი დღის ვადაში საპარლამენტო უმრავლესობის მხრიდან შეთავაზებული პრემიერ-მინისტრობის კანდიდატი უნდა წარადგინოს, თავის მხრივ, ასევე შვიდი დღის ვადაში, პრემიერ-მინისტრობის კანდიდატი მინისტრთა კანდიდატურებს შეარჩევს და ნდობის მისაღებად პარლამენტს წარუდგენს. პარლამენტსაც შვიდღიანი ვადა აქვს გადაწყვეტილების მისაღებად.

მთავრობისათვის პარლამენტის ნდობის მისაღებად საჭიროა პარლამენტის სიითი შემადგენლობის უმრავლესობის მხარდაჭერა.

[ნინო ნარიმანიშვილი, ახალციხე]