ასახა თუ არა დეკლარაციაში საჯარო მოხელემ ფარული წილი რესტორან „ალავერდში“

ახალციხის საკრებულოს დეპუტატმა და ფრაქცია „ქართული ოცნების“ თავმჯდომარემ მამუკა მიქელაძემ გასული წლისგან განსხვავებით, წელს რესტორან „ალავერდის“ მეწილე მისი მეღულე ნინო კარკაძე რომაა, დეკლარაციაში დააფიქსირა.

დოკუმენტის მიხედვით, ნინო კარკაძე აბასთუმნის გზატკეცილზე მდებარე შპს „ალავერდის“ სამეწარმეო საქმიანობაში მონაწილე პირია, საწარმოს საქმიანობიდან მიღებული შემოსავალი კი 0. 00 ლარია.

მამუკა მიქელაძემ დეკლარაცია მეორედ მიმდინარე წლის 8 სექტემბერს შეავსო. გასული წლის სექტემბერში შევსებულ დეკლარაციაში მეუღლის წილი მითითებული არ ჰქონდა.

„მაშინ ეს საწარმო მხოლოდ ფურცელზე არსებობდა“, – ამბობს მიქელაძე.

შეგახსენებთ, რომ გასულ წელს „ალავერდში“ არსებული წილი მამუკა მიქელაძესთან ერთად დეკლარაციაში, მაშინ სამცხე–ჯავახეთის გუბერნატორის მოადგილემ ავთანდილ კაჭკაჭაშვილმაც დაფარა.

ადგილობრივი თვითმმართველობის არჩევნების შემდეგ, ადგილობრივმა ხელისუფლებამ სტუმრებს „ალავერდში“ სამჯერ უმასპინძლა.

წარმომადგენლობითი ხარჯიდან მერიამ 1 920, გამგეობამ კი ჯერ 896, შემდეგ 540 ლარი გადარიცხა.

[თამუნა უჩიძე, ახალციხე]