საჯარო მოხელეების დაფარული წილები რესტორან ‘ალავერდში’

ფოტოზე: მარცხნივ მამუკა მიქელაძე. ფოტო გადაღებულია 2014 წლის 19 მაისს, მამუკა მიქელაძის უბნის მაჟორიტარად წარდგენისას

ფრაქცია „ქართული ოცნების“ თავმჯდომარე მამუკა მიქელაძე, რომლის მეუღლეც აბასთუმნის გზატკეცილზე მდებარე შპს „ალავერდის“ 34%–იანი წილის მფლობელია, აცხადებს, რომ დეკლარაციაში მეუღლის შემოსავალი, 3 128 ლარი მიღებული აქვთ ამავე მისამართზე რეგისტრირებული სხვა შენობიდან: „მანდ ვეტაფთიაქი ჰქონდა, მერე არ გაუმართლა და დახურა. დეკლარაციაში მითითებული შემოსავალი სწორედ ამ ვეტაფთიაქიდან იყო მიღებული“.

მიქელაძეს ეს შემოსავალი დეკლარაციაში მითითებული აქვს, თუმცა, ამავე მისამართზე, აბასთუმნის გზატკეცილზე მდებარე შპს „ალავერდში“ მეუღლის 34%–იანი წილი არა. ამბობს, რომ ეს მექანიკურად მოუვიდა, თუმცა აქვე მიუთითებს, რომ რესტორანს შემოსავალი მართლაც არ მიუღია.

კითხვაზე, როგორ მოხდა შემთხვევით, რომ არც მან და არც გუბერნატორის მოადგილემ შპს „ალავერდში“ მეუღლეების წილები დეკლარაციაში არ მიუთითეს, გვპასუხობს: „ხდება ხოლმე ასეთი რაღაცაც“.

შეგახსენებთ, რომ შპს „ალავერდში“ 34%–იანი წილის მფლობელი ნინო კარკაძე ქალაქის საკრებულოს დეპუტატის, ფრაქცია „ქართული ოცნების“ თვმჯდომარის მამუკა მიქელაძის მეუღლეა; 33%–ინი წილი მანანა კბილაშვილს, გუბერნატორის მოადგილის ავთანდილ კაჭკაჭაშვილის მეუღლეს ეკუთვნის; ასევე, 33%–იანი წილი აქვს იური ჩინჩალაძეს, იგი მექანიზაციის სერვისცენტრის მმართველის კახა ჩინჩალაძის მამაა.

გასულ წელს, ადგილობრივი თვითმმართველობის არჩევნების შემდეგ, ადგილობრივმა ხელისუფლებამ სტუმრებს „ალავერდში“ სამჯერ უმასპინძლა. წარმომადგენლობითი ხარჯიდან მერიამ 1 920, გამგეობამ კი ჯერ 896, შემდეგ 540 ლარი გადარიცხა.

[თამუნა უჩიძე, ახალციხე]