ვის შეასახლებენ დევნილებისთვის გარემონტებულ თავისუფალ ბინებში

საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტროში „სამხრეთის კარიბჭეს“ განუცხადეს, რომ ის ოჯახები, რომლებმაც ახალციხეში ბინები ვერ მიიღეს მათ საკუთრებაში რეგისტრირებული სახლები აღმოაჩნდათ. პირველ ეტაპზე კი პრიორიტეტი სოციალურად შეჭირვებულებზე გაკეთდა.

თუმცა, მიზეზი მხოლოდ ეს არ ყოფილა. როგორც სამინისტროში აცხადებენ, არიან ისეთ მრავალსულიანი ოჯახები, რომლებსაც ერთოთახიან ბინას ვერ გადასცემენ და მათთვის საჭირო სამოთახიანია: „ვფიქრობთ ალტერნატიულ შეთავაზებაზე“.

დარჩენილი თავისუფალი ბინები, შესაბამისი კომისიის მიერ პირველ რიგში სამცხე–ჯავახეთში მცხოვრები სხვა დევნილების გადასაცემად განიხილება. თუ ამის შემდეგ თავისუფალი ფართი ისევ დარჩება, მას სხვა რეგიონში მცხოვრებ დევნილებს შესთავაზებენ. ასეთის არ არსებობის, ან მათი მხრიდან უარის მიღების შემთხვევაში კომისია ეკომიგრანტებისთვის შეთავაზებაზე იმსჯელებს.

„ეს ბინები დევნილებისთვის აშენდა და აქ სხვა ვერავინ იცხოვრებს. თუმცა, თუ აქ ფართი თავისუფალი დაგვრჩება, მაშინ ისევ ჩვენი სამინისტროს ბენეფიციარებისთვის გამოვიყენებთ. მაგალითად ადიგენში ბევრი ეკომიგრანტი გვყავს და ბინას მას გადავცემთ, მაგრამ ასეთი შემთხვევები თითქმის არ გვაქვს–ხოლმე“, – გვიხსნიან სამინისტროში და ამატებენ, რომ ნებისმიერ შემთხვევაში ამის შესახებ კომისია იმსჯელებს.

შეგახსენებთ, რომ დღეს, 19 დეკემბერს ლტოლვილთა და განსახლების მინისტრმა სოზარ სუბარმა ახალციხეში ახალგარემონტებულ კორპუსში საცხოვრებლად დევნილებს გასაღებები თავად გადასცა. რუსთაველის N113–ში 26 ოჯახი შეასახლეს. აქ სულ 66 ბინაა: 13-ერთოთახიანი, 32-ოროთახიანი და 21-სამოთახიანი.

[თამუნა უჩიძე, ახალციხე]