ბორჯომში 18 დევნილ ოჯახს საცხოვრებელი ბინა გადაეცა

აფხაზეთიდან დევნილი ვალერი რეხვიაშილი საცხოვრებელი ფართით დაკმაყოფილებას ორი ათეული წელი ელოდებოდა. ამ პერიოდის განმავლობაში რეხვიაშვილს, ასაკოვან დედასთან ერთად, არაერთი გაჭირვების გადატანა მოუხდა.
„გულრიფშის რაიონიდან ვარ. 21 წელია ბორჯომში, „ლიკანი 2“ კორპუსში ვცხოვრობდი, აუტანელი პირობები იყო. მადლობის მეტი რა მეთქმის“, – ამბობს იგი.

ბინა მიიღო ცხინვალიდან დევნილმა ოთარ ზუბაშვილმაც: „25 წელი ვცხოვრობდით ცუდ პირობებში. ოჯახში ოთხნი ვართ და ოროთახიანი, გარემონტებული ბინა მოგვცეს“.

აფხაზეთიდან და სამაჩაბლოდან დევნილი 18 ოჯახი ბორჯომში, ყოფილ სამშობიარო სახლში იცხოვრებს. შენობის რეაბილიტაცია, 887.776 ლარი დაჯდა. რეაბილიტაცია საქართველოს მუნიციპალური განვითარების ფონდმა, ამერიკის შეერთებული შტატების საერთაშორისო განვითარების სააგენტოს (USAID-ის) დაფინანსებით განახორციელა.

შენობაში მოეწყო 8 ერთოთახიანი, 6 ოროთახიანი და 4 სამოთახიანი ბინა, მათ შორის, 1 ბინა შეზღუდული შესაძლებლობების მქონე პირებისთვისაა ადაპტირებული. ბინებში მოეწყო ინდივიდუალური სააბაზანო და საპირფარეშო. სამზარეულოებში დამონტაჟდა წყლის გამათბობლები, დაიდგა კარმის ტიპის გაზგამათბობელი. ეზოში მოწყო სათამაშო ატრაქციონი, ავტომანქანებისთვის სადგომი. დამონტაჟდა გარეგანათების ქსელი და დეკორატიული სანათები.

დევნილებს გასაღები განსახლებისა და ლტოლვილთა მინისტრმა სოზარ სუბარმა, საქართველოს რეგიონული განვითარებისა და ინფრასტრუქტურის მინისტრმა დავით შავლიაშვილმა, ამერიკის შეერთებული შტატების ელჩმა საქართველოში რიჩარდ ნორლანდმა და სამცხე–ჯავახეთის მხარის გუბერნატორმა აკაკი მაჭუტაძემ გადასცეს.

„ბედნიერი დღეა დღეს 18 ოჯახისთვის. ამდენი წლის განმავლობაში უმძიმეს პირობებში ცხოვრების შემდეგ მიიღეს საცხოვრებელი, რომელიც მათი საკუთრება იქნება“, – განაცხადა სოზარ სუბარმა.

„მთელი საერთაშორისო თანამეგობრობა და განსაკუთრებით, ამერიკის შეერთებული შტატები გვერდში გიდგათ. საერთაშორისო თანამეგობრობა ცდილობს რომ დიპლომატიური მოლაპარაკებების ფარგლებში, რომელიც ჟენევაში იმართება, მოიძებნოს გრძელვადიანი გადაწყვეტილება და მოგვარდეს აფხაზეთისა და სამხრეთ ოსეთის პრობლემა“, – განაცხადა ამერიკის შეერთებული შტატების ელჩმა საქართველოში რიჩარდ ნორლანდმა.

ღონისძიებას რეგიონული განვითარებისა და ინფრასტრუქტურის მინისტრის პირველი მოადგილე და მუნიციპალური განვითარების ფონდის აღმასრულებელი დირექტორი გიორგი ამაშუკელი, ამერიკის შეერთებული შტატების საერთაშორისო განვითარების სააგენტოს წარმომადგენელი კაროლ ვილსონი და დანიის ლტოლვილთა საბჭოს რეგიონალური წარმომადგენელი პოლ მაკინტოში ესწრებოდნენ.

[თინათინ ზაზაძე, ბორჯომი]